Los delegaos de la FSA aprueben la nueva executiva con namás nueve votos a la escontra

Crez la presencia femenina y van crease dos vicesecretaríes xenerales y dos secretaríes nueves

L’edificiu Calatrava d’Uviéu acoyó el pasáu fin de selmana el 33^u Congresu de la Federación Socialista Asturiana, nel que la nueva Comisión Executiva foi aprobada col 97,23% de los votos de los delegaos y delegaes a favor, ye dicir, con 315 votos de los 324 emitíos. El presidente, Adrián Barbón, destacó en referencia a la mayoría: "por fín toos y toes".

Cuasi la metá de los componentes de la executiva elixía, el 43%, son nuevos. Amás, medra la presencia de muyeres qu’ocupen 21 de los 35 puestos. Y hai tamién, edaes estremaes, de los 25 a los 88 años, "cuatro xeneraciones de socialistes" como apuntó Barbón.

Ente les novedaes de la nueva executiva, que sustitúi a la nomada nel congresu de 2017, ta la creación de dos vicesecretaries xenerales per vez primera: la d'Acción Política y Institucional, baxo la direición d’Iván Fernández, alcalde de Corvera, que va trabayar xunto a la vicesecretaria d'Organización y Coordinación yá esistente y dirixía por Gimena Llamedo.

Tamién supón una novedá la creación d'una secretaría de Polítiques LGTBI, de la que va tar al cargu Álvaro Abargane del Ríu, y una de llucha contra la violencia machista, con Clara María García Pérez. Salen de la Executiva'l conseyeru d'Industria, Enrique Fernández, y l'alcaldesa de Xixón, Ana González, que pasen al Comité Federal. Tamién queda fuera'l conseyeru de Mediu Rural, Alejandro Calvo. Anque taba previsto que’ l presidente del PSOE, Pedro Sánchez asistiera, nun lo fizo por cambeos na axenda de reuniones internacionales.