Los datos de la COVID-19 dexen una muerte y nengún contaxu

Procesáronse 1.257 muestres por PCR.

El miércoles rexistróse una muerte por COVID-19 n'Asturies, lo que dexa'l total de persones finaes en 311. Na xornada anterior nun hebo nenguna perda, al igual que'l vienres, mentes que sábadu, domingu y llunes llamentamos una cada día.

Lo más positivo de l'actualización última, con datos de la medianueche, ye l'ausencia de contaxos con 1.257 muestres procesaes, polo que la cifra de positivos queda en 2.400. La última vegada que se dio esta situación foi'l llunes.

Na UCI baxó en 3 pacientes el númberu d'ingresaos, quedando'l total en 10, mentes qu'en planta hai dos menos, polo que siguen hospitalizaos 32. El númberu de curaciones aumentó en 40, que fai medrar hasta 1.583 les persones con alta epidemiolóxica.