Los datos de contaxos del xueves raspien el récor de la tercer fola

|
Fileres vacunación en Perchera-La Braña

Comunicáronse un total de 611 casos nuevos.

Asturies ta sumando cifres de rércor esta selmana. Si'l xueves pasáu comunicábense 239 contaxos –243 depués d'una revisión–, no que yera la cantidá más alta dende'l 11 de febreru, la cantidá caltúvose en cifres altes y aumentó de manera importante nos trés díes últimos con 389, 484 y 611 casos nuevos –l'actualización auméntalos a 619 por positivos non contabilizaos en xornaes anteriores–.

El d'ayeri ye'l datu más eleváu dende'l 26 de xineru, cuando se rexistraron 614 –nun primer momentu informóse de 591–, récor de la tercer fola. La diferencia con respeuto a aquellos meses ta na baxa presión hospitalaria actual por mor de la vacunación nos grupos de mayor edá.

Fixéronse 3.455 pruebes de diagnósticu d'infeición activa, polo que la tasa de positividá s'asitió nel 18,06 por cientu, superior a la xornada anterior, cuando foi del 14,44 por cientu con 3.406 tests realizaos. A 7 díes esti porcentaxe taba'l miércoles nel 12,86 por cientu –ayeri xubió al 14,06 por cientu–.

Tampoco nun hebo que llamentar finaos per novenu día siguíu, polo que'l total persones que perdieron la vida nel andanciu caltiénse en 1.981. 52 pacientes tán hospitalizaos con confirmación o sospecha de COVID-19, 3 más que'l miércoles, a los qu'hai que sumar otros 12 ingresaos na UCI, 1 más.

Na semeya, persones esperen nel pabellón de Perchera-La Braña, en Xixón, pa dar los sos datos enantes de vacunase contra la COVID-19.

Contador Estadistiques