Los Cursos d’Afondamientu Cultural y Llingüísticu de la UABRA disponen de les sos últimes places llibres

Queden poques places por cubrir nos Cursos d’Afondamientu Cultural y Llingüísticu de la Universidá Asturiana de Branu (UABRA). Éstos tienen una selmana de duración y van celebrase del 29 de xunetu al 9 d’agostu en Cangas.

Les persones interesaes n’acudir a dalgún de los cursos programaos pa esta edición de la UABRA han de ponese en contautu cola Academia de la Llingua Asturiana nel so llocal asitiáu na cai L’Águila, númberu 10, d’Uviéu, o nel teléfonu 985.21.18.37 –n’horariu de 8 a 15 hores–, p’algamar información, yá que son escases les places que queden llibres. El preciu de matrícula ye de 190 euros y inclúi los materiales y l’agospiu, con pensión completa, na Escuela-Hogar de Cangas del Narcea. Hai que destacar que los Cursos d’Afondamientu Cultural y Llingüísticu de la UABRA formen parte de los Cursos d'Estensión Universitaria de la Universidá d’Uviéu, polo que los seis títulos inclúin creitos universitarios.

Ún de los cursos que dispón tovía de places llibres ye’l de ‘Xestión cultural n'Asturies: trabayando con llingües y cultures’, que se va impartir del 5 al 9 d’agostu. Ésti va afondar na conocencia de la teoría y les ferramientes práutiques de la xestión cultural venceyaes n’especial a los campos de la xestión de la política llingüística y la cultura n’Asturies, averando a los alumnos y alumnes a la conocencia de la situación de la estaya y apurriendo ferramientes básiques pal trabayu nel campu de la xestión cultural nel país. El cursu ta dirixíu por Isabel Hevia, profesora de la Universidá d'Uviéu y esperta en programes sociales d'aición cultural, y va cuntar ente'l profesoráu col periodista y especialista en xestión cultural Inaciu Galán, encargáu del bloque d'Averamientu a la xestión cultural; la responsable de la Oficina Municipal de la Llingua de Xixón, María Xosé Rodríguez, que centrará les sos sesiones nel campu de la xestión de la normalización de llingües; y el periodista de TPA y profesor de la Universidá CJC, Cristóbal Ruitiña, que dedicará la so parte del cursu a la difusión de la información nel ámbitu de la xestión cultural.