Los cuatro grupos políticos municipales utilizaron la llingua asturiana nel Plenu de Xixón

La popular Pilar Fernández Pardo y el socialista José Ramón Tuero utilizaron la llingua asturiana nel Plenu de Xixón, al igual que Carlos Rubiera (FAC) y Jorge Espina (IX-LV). L’edil de la coalición denunció la desapaición del topónimu 'Xixón'.
 
Esta situación non habitual na Casa Conceyu de la ciudá más poblada del país diose tres el pidimientu de comparecencia del conceyal d’Educación, Cultura, Mocedá y Festexos, Carlos Rubiera, fecha por Izquierda Xunida-Los Verdes d’Asturies pa qu’esplicara la política llingüística del conceyu y por qué’l topónimu asturianu, oficial na ciudá xunto col castellanu, desapaeció de los documentos oficiales y de les actividaes promocionales de la ciudá. Rubiera defendió la so xestión y apuntó que trata de buscar l’equilibriu “pa nun ferir sensibilidaes”. D’igual forma, anunció’l cambiu de la denominación de la Oficina Municipal de la Llingua, que pasa a llamase Oficina de Normalización Llingüística, y la salida a concursu de la plaza de la mesma, y destacó la presencia que va tener l’idioma nel Festival Arcu Atlánticu que va celebrase en xunetu, la introducción de criterios d’usu d’asturianu nes bases de les subvenciones del Teatru Xovellanos, la creación del premiu a la Romería más Asturiana del Conceyu y l’entamu d’una llinia nueva de trabayu cola Academia de la Llingua Asturiana, ente otres coses.
 
Llamó l’atención el fechu de que tolos grupos utilizaren la llingua asturiana nel restu d’intervenciones, n’especial nel casu de Fernández Pardo, vocera municipal del PP, yá que’l socialista Tuero ye un políticu conocíu por respetar la llingua asturiana. La edil popular pidió al gobiernu de FAC qu’avanzara na normalización del asturianu y aconseyó la puesta en marcha d’una serie d’actuaciones concretes: l’usu institucional del asturianu, l’entamu de cursos d’iniciación y afondamientu, y la presencia del idioma na web del Ayuntamientu, ente otros. Tres estes pallabres, Rubiera agradeció a Fernández Pardo’l so esfuerzu por utilizar l’asturianu pese a que “nun ye la so llingua materna”.
 
Pela so parte, Tuero criticó la política cultural de FAC y Espina recriminó al edil responsable de la política llingüística municipal l’ausencia d’avances nesti campu frente a lo fecho na llexislatura anterior y la desapaición del asturianu na señalización y cartelería municipal.