Los críticos del PP cuestionen a Ovidio Sánchez pol resultáu electoral

El resultáu electoral del PP nes pasaes autonómiques, nes que volvió a encurtiar la difereiencia de votu col PSOE pero ensin consiguir l'oxetivu de facese primer fuerza política del país ta sacando angüeñes ente dellos responsables del partíu y cargos del PP críticos cola figura d'Ovidio Sánchez y que piden un relevu al frente de la organización. Dempués de les declaraciones del alcalde d'Uviéu Gabino de Lorenzo, qu'adelantaba esti fin de selmana que podía ser el momentu pa una reforma interna nel partíu en cuantes que ""tolo que nun sía gobernar güel a derrota".

La diputada Alicia Castro Masaveu amestose tamién a les crítiques, ente les que rescamplaron les la figura del hasta agora alcalde de Navia Manuel Bedia, derrotáu dempués de más de venti años en cargu y que foi mui duru al valorar la situación xeneral del so partíu, del qu'aseguró que nun ta en condiciones de ganar unes elecciones, una situación de la que-y echó tola culpa a Ovidio Sánchez, del que dixo que "ta en Punta Cana" cuando "tendría que tar dando cuenta de los resultaos a los afiliaos".

Mientres la dirección del partíu n'Asturies nun fexo valoraciones sobre estes declaraciones de Bedia, qu'apuntó a Casatro Masaveu como la figura que tendría de rexenerar la organización, a les voces crítiques amestóse tamién Juan Morales, que nel so día compitiere con Ovidio Sánchez por ser el cabeza de llista electoral del PP y qu'aseguró que "dir a les elecciones xenerales según ta la situación sedría'l descalabru y el suicidiu políticu. Morales y otros críticos del PP celebraron ayeri en Siero una primer reunión pa valorar la situación y estudiar una posible vía de cambéu de líder nel PP asturianu. Otres voces, casu la de la vicepresidenta del partíu Pilar Fernández Pardo quieren más templar gaites. La candidata por Xixón nes últimes votaciones aseguró que yera ceo pa cambeos y descartó que fuera facese un congresu col oxetivu de la renovación. Sicasí, el diariu La Nueva España adelanta n'esclusiva na so edición d'esti vienres que Sánchez tendría ya pautáu col alcalde d'Uviéu Gabino de Lorenzo un tratu p'abandonar la so posición d'una manera posada.