Los crímenes franquistes en La Tiyera van denunciase esti xueves énte'l Consuláu arxentín

16 Xunetu, 2014 por Pablo R. Guardado

Inicie sesión o rexístrese pa espublizar comentarios

Cuatro persones van presentar énte’l Consuláu arxentín en Madrid denuncies por asesinatos, desapaiciones, encarcelamientos y tortures socedíos en tiempu de la Guerra Civil y la posguerra. Tolos afeutaos yeren de La Tiyera.

Esti pequeñu pueblu llangreanu asitiáu nel altu qu’estrema los conceyos de la parroquia de Ciañu y la mierense de Santa Rosa, conformáu por media docena de cases na que vivíen una docena de families, sufrió ente 1937 y 1941 una masacre auténtica: quince vecinos resultaron muertos, otros siete pasaron peles prisiones y campos de concentración, y a otru desterráronlu. Dedicáu nes primeres décades del sieglu XX a la esplotación del carbón, La Tiyera yera un nucleu con muncha actividá sindical y política, lo que nun dexaron pasar de llargu les autoridaes franquistes, que principiaron una represión importante contra la so población.

Cuatro familiares d’estes persones, en concreto Maximino Rodríguez Fernández (nietu de Vicente Rodríguez Rodríguez y Josefina Zapico), Vicente Fernández Zapico (sobrín d’Amada Zapico y Tomás Fernández Zapico), y Joaquín y José Ramón Fernández García (nietos de Pilar Terente y sobrinos de Belarmino Fernández Terente) van desplazase mañana a Madrid pa presentar denuncies polos fechos acontecío en la Tiyera ente 1937 y 1941 énte’l Consuláu arxentín. L’oxetivu ye sumar estes casos a la causa que la xueza María Servini de Cubría dirixe n’Arxentina pa investigar los crímenes del franquismu, que yá tien sobre la mesa otres munches denuncies procedentes d’Asturies.

Dende'l mes de setiembre, Arxentina habilitó los sos consulaos en tol mundu pa que puedan recibir denuncies de víctimes del franquismu, depués d'una solicitú fecha nesi sen por Servini de Cubría, evitando asina que los denunciantes tengan que viaxar a Buenos Aires. Esta xueza ye la responsable de la nomada ‘Querella Arxentina’, causa abierta nel 2010 qu’investiga los crímenes del franquismu y que ye la esperanza principal de munches persones pa xulgar a los responsables d’asesinatos y tortures que quedaron impunes dafechu pola Llei d’Amnistía española del 1977.

La historia de los represaliaos de La Tiyera

Los cuatro denunciantes tienen el sofitu de La Comuna d’Asturies, grupu asturianu que forma parte de la Coordinadora Estatal d’Apoyu a la Querella Arxentina contra Crímenes del Franquismu (CeAQUA) y qu’entamó un actu en La Tiyera pa dar a conocer la terrible represión que vivieron los habitantes del pueblu mientres la Guerra Civil y la posguerra. La historia d’estes víctimes del franquismu ye la siguiente:

“En febreru de 1937, seis díes depués de la entrada en Xixón de les tropes franquistes, saquen de casa a Vicente Rodríguez Rodríguez y a Cecilio González pa llevalos al cuartel de la Guardia Civil en Santu Miano. Pel camín tortúrenlos hasta matalos y entiérrenlos en monte. Los sos familiares nun pudieron treslladar los cuerpos a un cementeriu hasta 1952.

En marzu, el vecín Jesús Iglesias muerre na cárcel pola fame y les tortures. En La Tiyera el panorama nun yera meyor. Ellí instálase un cuartel onde actúen miembros de la Guardia Civil, del Exércitu, falanxistes, mercenarios de Marruecos... Lo que yera un espaciu d’actividaes cíviques conviértese nun escenariu de violencia y muerte. Namás queden les muyeres, los neños y los vieyos, porque los mozos echárense al monte o taben escondíos. N’avientu d’esi mesmu añu, prenden a dos fíos de Vicente, Antonio y Onofre Rodríguez Zapico, que taben fugaos. Son condenaos a muerte, anque la pena conmútase más tarde por 30 años de prisión.

En 1938, asesinen a balazos a otru hermanu, Vicente Rodríguez Zapico, que taba escondíu en casa d’una vecina,Carmen, a la que manden al campu de concentración d’Arnao, n’As Figueiras (Castripol). N’ochobre, otra vez nel altu de Santu Miano, maten a palos a Pilar Terente Fernández y a Amada Zapico Zapico, que tenía al home, Tomás Fernández Zapico, fugáu en monte. Pilar, viuda, tuviere que marchar de casa con cinco de los sos fíos porque-y la quemaren como represalia: el fíu mayor, Belarmino, de 17 años, echárese al monte pa nun tener que s’alistar nel Exércitu franquista. Los dos fíos pequeños d’Amada quedaron colos güelos. Naide pudo enterrar los cuerpos de Pilar y Amada porque los sos asesinos tiráronlos pela chimenea d’una mina.

La represión sigue contra les families de La Tiyera. En mayu de 1939 la Guardia Civil asesina en monte a Belarmino Fernández Terente, fíu de Pilar. Los otros cinco hermanos, ente los 16 y los 7 años, tuvieren que marchar de criaos a otros pueblos. En xunetu, condenen a muerte a Samuel Solís Fernández y fusílenlu nes paredes del cementeriu d’Uviéu.

N’abril de 1940 un grupu de la “brigadilla” asesina a Tomás Fernández Zapico, home d’Amada Zapico, y a Aladino García Fernández, que taben escondíos nuna casa cerca de La Tiyera. Quemen la casa y van pal pueblu, onde garren a dos muyeres que taben llavando y dan-yos una paliza. Son Benigna González Llaneza y Josefina Terente Zapico. Esta última tienen qu’internala nel Psiquiátricu y nunca se recuperó. Nesi mesmu mes, la Guardia Civil tamién mata aSilvino Iglesias Iglesias cuando taba escondíu con otros en Cardiñuezo (Ciañu). Mentanto, otru vecín de La Tiyera,Manuel González, muerre na cárcel d’El Dueso (Cantabria) por cuenta de la fame y los malos tratos. En xunu d’esi añu, un grupu de falanxistes asesina nuna casa de La Tiyera a César Rodríguez Zapico, fíu de Vicente y Josefina, y aEliseo Argüelles Álvarez. Los cuerpos tuvieron na plaza del pueblu munchu tiempu, anque los sos familiares nun pudieron enterralos nin supieron ónde acabaron.

L’últimu casu d’esti rosariu de matances ye n’ochobre de 1941, cuando un grupu de falanxistes asesinen na so casa a golpes a Josefina Zapico Zapico, viuda de Vicente Rodríguez Rodríguez, que yá tuviere desterrada, viere morrer a dos fíos y que tenía a otros dos na cárcel.

Pero la represión tamién llegó a otros vecinos de La Tiyera en forma de prisión o destierru. A Gil González Zapico, otru de los fíos de Vicente y Josefina, desterráronlu. A Maximino, otru hermanu, mandáronlu pal campu de concentración d’As Figueiras, que yera’l métodu qu’usaba’l réxime franquista pa cortar l’ayuda que les families daben a los fugaos nel monte. Con él diben la so muyer Delfina Fernández Iglesias y les sos fíes más pequeñes, Predestina y Dorina.”