Los contaxos siguen perbaxo del centenar

Los datos del miércoles, con 94 casos nuevos, son mui asemeyaos a los del martes.

A falta de la espublización de les cifres oficiales de la COVID-19, la comunicación de la Conseyería de Salú sobre la situación de la pandemia a día d'ayeri sigue dexando datos positivos, cola esceición de les dos persones finaes, muyeres de 73 años, que ponen el total del andanciu en 2.044. Los contaxos entá son altos, pero estabilícense perbaxo del centenar.

En concreto ayeri detectáronse 94, 2 más que'l martes, cuando s'informó de 92. La tasa de positividá asitióse nel 5,21 por cientu, al facese 2.322 pruebes de diagnósticu d'infeición activa, cuando la xornada previa foi del 5,92 por cientu.

A 7 díes esti porcentaxe yera enantes de l'actualización del 7,83 por cientu –ayeri baxó al 7,01 por cientu–, en clara tendencia descendente. La Organización Mundial de la Salú (OMS) marca'l 5 por cientu como la llende a partir de la que s'empieza a perder el control de la pandemia, cifra que se ta raspiando estos trés díes últimos.

Hai 89 pacientes hospitalizaos con confirmación o sospecha de COVID-19, 2 más que'l martes. Mentes, na UCI tán ingresaos otros 23, 2 menos.

14 biltos activos

Asturies informó al Ministeriu de Sanidá de la esistencia de 14 biltos activos nel periodu del 9 al 15 d'agostu, 11 menos que la selmana pasada, con un total de 270 casos. 2 brotos detectáronse estos 7 díes últimos, comunica la conseyería.