Los conceyos qu’aprobaron mociones a favor de la oficialidá representen al 65,66 por cientu de la población

Llaviana y Villaviciosa incorporáronse recién a la llista conceyos que sofiten la oficialidá al traviés de mociones aprobaes en Plenu, trámite qu’esti martes tamién cumplió Uviéu cola oposición del Partido Popular (PP) y Ciudadanos. Estos diez ayuntamientos representen al 65,66 por cientu del total de la población d’Asturies. 

El porcentaxe ta actualizáu en referencia al qu’Asturies.com espublizó n’avientu, que yera del 62,79 por cientu, teniendo agora en cuenta los datos oficiales del padrón a fecha del 1 de xineru del 2017 que recueye l’Instituto Nacional de Estadística (INE), que nesi momentu yeren provisionales. Asina, Asturies pasa a tener 1.034.960 habitantes –polos 1.042.608 del añu anterior–, sumando estos diez conceyos un total de 679.548 ciudadanos, lo que supón el 65,66 por ciento del total d’asturianes y asturianos.

Bimenes, Mieres, Xixón, Uviéu, Avilés, Noreña, Ḷḷena, Castrillón, Llaviana y Villaviciosa son los ayuntamientos que, de momentu, dieron el pasu el pasu de sofitar la oficialidá y demandar al Gobiernu y a la Xunta Xeneral l’entamu d’un procesu de reforma del Estatutu pa incluyila, o dieron pasos como oficializala nel so territoriu, como’l conceyu yerbatu. L’últimu en formalizar esti pasu foi Uviéu, que yá en payares fixo una declaración institucional nesi sen cola intención de llevala a Plenu, pasu que se dio ayeri.

La moción, que sigue la mesma llinia que les aprobaes nel restu de conceyos, salió alantre col votu de les trés formaciones presentes nel equipu de gobiernu municipal: PSOE (5), Somos Uviéu (6) y Izquierda Xunida (3). El Partido Popular (11) y Ciudadanos (2) posicionáronse en contra, polo que, pola ausencia del conceyal Roberto Sánchez Ramos, hebo un empate a 13 que frayó’l votu de calidá del alcalde, Wenceslao López.

Ensin plazos

Nel casu de la d'Uviéu nun pon plazos p'abrir esi procesu de reforma del Estatu nesta llexislatura, como sí afalen otres de les aprobaes n'otros conceyos. Otra manera, la uviedina inclúi un puntu nel que sofita "al gobiernu municipal na puesta en marcha de midíes d'usu nel ámbitu municipal que favorezan la normalización del asturianu nel conceyu asina como'l compromisu d'estudiar la puesta en marcha d'un serviciu de normalización llingüística nel Ayuntamientu".