Los conceyos del occidente disponen d'un equipu de sofitu a les families

Con sede n'El Franco, un Equipu d'Intervención Téunica d’Apoyu a la Familia (EITAF) va dar serviciu a los diecisiete conceyos del occidente del país, que correspuenden al l'área I de Servicios Sociales. Va tar formáu por una psicóloga y una educadora social.

La conseyera de Servicios y Derechos Sociales, Pilar Varela, participó ayeri, xunto cola direutora de Servicios Sociales de Proximidá, Lina Menéndez, nel actu entamáu pol Conceyu d'El Franco pa presentar el serviciu nuevu y a los dos profesionales escoyíes pa emprestar l'atención. Al actu asistieron tamién l'alcaldesa d'El Franco, Cecilia Pérez, y otros primeros ediles del área.

Los EITAF son recursos especializaos destinaos a facilitar l’exerciciu afayadizu de les funciones parentales, ameyorando les rellaciones socio-familiares y promoviendo’l desenvolvimientu y bienestar del menor. Trátase d'un serviciu qu'impulsa y financia’l Gobiernu y qu'empresten les entidaes locales al traviés de convenios cola Conseyería de Servicios y Derechos Sociales.

Los conceyos cabecera de la EITAF firmen el conveniu col Principáu y encárguense de facilitar el llocal, contratar a los profesionales y ufiertar el serviciu tanto nel so territoriu como nos conceyos que formen parte de la so contorna. El restu de conceyos sólo cuerren colos gastos de desplazamientu de los profesionales, cuando los haya.

L'EITAF d'El Franco va dar serviciu a los conceyos de Bual, Castropol, Cuaña, Grandas de Salime, Eilao, Valdés, Navia, Pezós, Samartín d'Ozcos, Santalla d'Ozcos, San Tiso d'Abres, Tapia de Casariego, Taramundi, A Veiga, Vilanova d'Ozcos y Villayón. Nel restu del país hai doce servicios más que cubren tol territoriu.