Los cinco volumes del 'Atlas Sonoru de la Llingua Asturiana', disponibles na rede pa la so consulta

Los 63 documentos sonoros que conformen el ‘Atlas Sonoru de la Llingua Asturiana’, dividíos en cinco volumes, yá se pueden consultar n’Internet. El Muséu del Pueblu d’Asturies ta acabante de colgalos na web de REDMEDA.

 

D’esta forma, toles persones que quieran consultar los 63 cortes con testimonios orales que cunten lleendes, cuentos, cantares y rellatos por parte de falantes naturales de delles fasteres d’Asturies, van poder facelo de baldre. En total, son 23 los conceyos onde se fixeron les grabaciones, que suponen una perbona amuesa del patrimoniu cultural inmaterial del país. Na web de la Rede de Museos Etnográficos d'Asturies (REDMEDA), los documentos sonoros vienen acompañaos d’un testu pa facilitar la so comprensión, amás d'un mapa y datos sobre los informantes.

 

Los cinco volumes del ‘Atlas Sonoru de la Llingua Asturiana’ son los siguientes:

 

1.      ‘Atlas sonoru de la ḷḷingua asturiana I. Surroccidente d’Asturies’ (2003), obra de Naciu'l Riguilón y Xesús Suárez López, Jesús (grab.). Editáu pola Fundación Municipal de Cultura, Educación y Universidá Popular, y el Muséu del Pueblu d’Asturies en formatu de CD audio con folletu. Reseña: La primera entrega de esta serie recueye diecinueve grabaciones feches en siete conceyos del suroccidente asturian (Ibias, Degaña, Cangas del Narcea, Tinéu, Ayande, Miranda y Somiedu) por Ignacio Martínez Alonso, ‘Naciu'i Riguilón’, y por Jesús Suárez López, y acompáñase d’una descripción de los rasgos llingüísticos más relevantes de cada zona, asina como de la trescripción lliteral de los relatos conteníos en diches grabaciones.

 

2.      ‘Atlas sonoru de la llingua asturiana II. Centro-occidente d’Asturies (Miranda, Grau, Tameza, Teberga y Quirós)’ (2004), obra de Xesús Suárez López y Antón Fernández Martínez. Editáu pola Fundación Municipal de Cultura, Educación y Universidá Popular, y el Muséu del Pueblu d’Asturies en formatu de CD audio con folletu. Reseña: Esti segundu CD cuenta cola colaboración de Xosé Antón Fernández Martínez ‘Ambás’, cantante y instrumentista de los grupos N'Arba y Tuenda, folclorista avezáu y bon conocedor de la fala de la zona.

 

3.      ‘Atlas sonoru de la llingua asturiana III. La Montaña Central d’Asturies (Ḷḷena, Riosa, Morcín, Mieres y Ayer)’ (2006), obra de Xesús Suárez López. Editáu pola Fundación Municipal de Cultura, Educación y Universidá Popular, y el Muséu del Pueblu d’Asturies en formatu de CD audio con folletu. Reseña: El tercer volumen recueye una serie de grabaciones procedentes de los conceyos de  la Montaña Central d’Asturies, que tienen como rasgos comunes l’uso de la consonante africada apical palatal sorda –conocida popularmente como ‘che vaqueira’– y la metafonía por -u –inflexión producida pola -u final sobre otra vocal que la antecede na mesma palabra, de mou  que ‘á>é / é>í / ó>ú’–, too ello independientemente de que nos alcontremos na zona de femenín plural termináu en –‘as’ (zona sur de Ḷḷena y Ayer) o fináu en ‘-es’ (Riosa, Morcín y Mieres). Amás d’estes particularidaes llingüístiques, la riqueza de les narraciones orales conteníes nesta tercer entrega estiéndese a otros campos como la etnomusicoloxía, la sociollingüística, la etnografía, la medicina popular, la mitoloxía o la lliteratura.

 

4.      ‘Atlas sonoru de la llingua asturiana IV. El Valle’l Nalón (Llangréu, Samartín del Rei Aurelio, Llaviana, Sobrescobiu y Casu)’ (2008), obra de René de Coupad y Xesús Suárez López. Editáu pola Fundación Municipal de Cultura, Educación y Universidá Popular, y el Muséu del Pueblu d’Asturies en formatu de CD audio con folletu. Reseña: Nesta cuarta entrega preséntense una serie de grabaciones feches nos conceyos de la cuenca del Nalón que, xunto coles grabaciones procedentes de la cuenca del Caudal editaes  nel volume III, representen l’asturiano nuclear, según la terminoloxía propuesta por Xosé Lluis García Arias na ‘Gramática Histórica de la Llingua Asturiana’.

 

5.      ‘Atlas sonoru de la llingua asturiana V. El cordal oriental d’Asturies (Ponga, Amieva, Cangues d’Onís y Cabrales)’ (2010), obra de Xesús Suárez López y René de Coupaud. Editáu pola Fundación Municipal de Cultura, Educación y Universidá Popular, y el Muséu del Pueblu d’Asturies en formatu de CD audio con folletu. Reseña: Contién lleendes, cuentos y histories rellataos na llingua asturiana de los conceyos del cordal oriental d’Asturies. Asina, atopamos histories sobre llobos, espíritus, el cuélebre de Parna o’l diablu grináu, ente otros.

 

Los 17 conceyos del occidente

 

L’Archivu de la Tradición Oral del Muséu del Pueblu d’Asturies ta trabayando anguaño na edición d’una serie nueva de documentos sonoros. Éstos van centrase nos territorios de fala eonaviega del occidente del país y tamién van incorporase a la edición en llinia del ‘Atlas Sonoru de la Llingua Asturiana’.