Los centros sociales axúntense en defensa del Llar El Mataderu

Esti espaciu de La Pola Siero va acoyer delles actividaes y un conciertu de rock.

El sábadu el Llar El Mataderu va acoyer la I Xuntanza de Centros Sociales Autoxestionaos d'Asturies, que se lleva a esti espaciu polesu pa sofitalu énte la intención del Conceyu de Siero de valtalu. Participen el CSA La Xusticia (La Felguera), el CSA La Semiente (L'Entregu), l'Espaciu La Llegra (Uviéu), el CSA L'Apiaderu (El Remediu), Sestaferia CS (Xixón), CSA La Kuadra (La Pola Llaviana) y l'AC Les Ablanes (Piloña).

L'actividá nel llugar va arrancar a les 11 hores, con un alderique progromáu pal meudía entituláu 'De los CSOA a los CSA, pasáu, presente y futuru'. A les 13.30 hores va entamase un campeonatu de gomeru y va celebrase dende les 14 un vermú amenizáu por Nun Tamos Toes y Femfarria.

Llueu d'una xinta popular va haber de tarde, dende les 16 hores, xuegos tradicionales y, a les 18, un pasucais reivindicativu per La Pola. Pa poner el ramu a la xuntanza va celebrase un conciertu solidariu a les 19 hores cola participación de los grupos Disaster Sisters, Sangre d’Ochobre, Expropiazión, Karank, Desaniciu, Ochobre, KPE(r) y The Rotten Teens.