Los cantarinos invaden los chigres de La Pola Siero

Esti vienres y sábadu va celebrase en 18 establecimientos de La Pola Siero’l V Certame de Cantares de Chigre alredor de la sidra. L'Asociación Amigos del Roble entama esta actividá na que participen tertulies d’Asturies y Cantabria.
 
Nesta edición, el númberu de chigres que tomen parte d’esta iniciativa que coincide col Antroxu polesu asciende a 18. Estos establecimientos, como ye vezu, van acoyer les tertulies que-yos toque dende les 21 a les 23 hores, anque la folixa en sí nun tenga hora. A lo llargo d’estes dos hores, los integrantes d’estos grupos formaos por ocho o diez persones, que son convidaos a merendar polos chigreros, van cantar temes tradicionales asturianos. Nesti sen, la organización va repartir unos 8.000 cancioneros pa que la xente pueda siguir la celebración a la par de les actuaciones.
 
Los chigres participantes nesta edición del V Certame de Cantares de Chigres son El Pumarín, el Manolo Jalín, El Madreñeru, La Terraza, La Guarnicionería, La Madreñería, El Culetín, Paco, El Polesu, El Pedregal, Mesón Siero, La Teya, El Brasero, Peñamayor, Otero, Karting, Los Robles y Cuévano. Cada día, estes sidreríes van recibir una tertulia distinta. Esti añu van acudir a La Pola Siero grupos de collacios de los conceyos de Noreña, Vargas (Cantabria), Uviéu, Mieres, Colunga, Grau, Xixón y Llangréu, amás d’una de la Comarca la Sidra y varies de delles poblaciones de Siero.