Los bolos serán bien d'interés cultural

El plenu del Conseyu del Patrimoniu Cultural declarará cinco bienes asturianos como d'interés cultural. Amás de los bolos, súmense a esta llista los traxes d'aldeana y porruanu llaniscos, el pobláu mineru de Bustiello, el Palaciu de Sorribes y once órganos.

Esta catalogación como BIC supón un réxime de proteición que determina, ente otres coses, que cualquier actuación nel casu de los bienes inmuebles necesiten el preste de la Direición Xeneral de Patrimoniu Cultural. Na reunión de güei, presidida pol conseyeru Genero Alonso, aprobóse l'aniciu de la tramitación alministrativa d'estos espedientes, amás de la declaración definitiva como BIC de la Universidá Llaboral de Xixón, el Muséu Evaristo Valle —tanto l'edificiu como la so coleición—, l'acueductu de Los Pilares (Uviéu), la Torre de Noriega (Ribadeva) y el Palaciu d'Aramil (Siero).

Otres decisiones tomaes pol Conseyu del Patrimoniu Cultural son llendar l'entorno de proteición de la ilesia y casa rectoral de Soutu Lluiña; del monasteriu de San Salvador de Corniana; y de la ilesia de San Salvador de Priesca, los trés monumentos de la llista de patrimoniu mundial de la UNESCO al tar venceyaos al Camín de Santiago. Tamién incorporar los xacimientos de La Carisa a la Ruta la Plata, que ta en trámites de ser BIC-Vía histórica.

Obres d'ameyoramientu

Na reunión analizáronse dellos proyeutos d'intervención en bienes patrimoniales protexíos. Asina, aprobóse la restauración de fachaes del claustru barrocu del conventu antiguu de Santa Clara, n'Uviéu, y les obres de consolidación de la que fora fábrica de tabacos de Xixón, en Cimavilla.