'Los Bolechas' tuvo una audiencia del 5 por cientu tres la quexa de la XDLA

|
'Los Bolechas' tuvo una audiencia del 5 por cientu tres la quexa de la XDLA

La TPA emitió la segunda temporada de 'Los Bolechas' ensin facer anuncia nenguna, provocando que l'audiencia del esitosu programa infantil fora mínima. Tres la denuncia pública fecha pola XDLA d'esta situación, l'espaciu n'asturianu superó la media de la canal, algamando'l 5,2 por cientu de cuota de pantalla.

Los datos del llunes 29 d'agostu dan unos porcentaxes del 4,3 por cientu, 5 por cientu y 5,2 por cientu a los trés programes de 'Los Bolechas' emitíos de magar les 9 hores, cifres que contrasten colos previos del mes, que nun llegaben al 1 por cientu por mor de la falta d'anuncia y promoción de la emisión de la segunda temporada de los populares personaxes por parte de la TPA. La denuncia pública de la Xunta pola Defensa de la Llingua Asturiana (XDLA), avanzada por Asturies.com, provocó que'l programa d'orixe gallegu volviera a les cifres habituales de la primer temporada.

Cola llegada del cursu escolar, 'Los Bolechas' desapaez de la parrilla sustituyíu por 'TPA Noticias Matinal', pero finó la so emisión con unos datos d'audiencia qu'amuesen l'interés de los neños y neñes asturianos nesti espaciu infantil en llingua asturiana. En Galicia, 'Os Bolechas' yá suma cinco temporaes, polo qu'entovía hai una llarga serie de capítulos que podríen tornase al asturianu pa la so emisión pela canal pública asturiana.

'Orixe' nun puede cola competencia de 'Gran Hermano'

La emisión nel Día de la Nación Asturiana de la versión asturiana de 'Inception', tornada al nuesu idioma como 'Orixe', nun tuvo un bonu resultáu d'audiencia al sumar un 1,2 por cientu de cuota de pantalla. La competencia cola estrena de la decimosétima edición de 'Gran Hermano' fixo que la emisión d'esta película n'asturianu nun algamara les importantes cifres de les dos anteriores, siempre perriba de la media de la TPA.

'Gran Hermano' ye tradicionalmente un programa con munchu tirón nel país, que nesta edición agrándase cola presencia d'una concursante asturiana, Candelas, procedente de Llanera. El share nel Estáu foi del 20 por cientu, que n'Asturies casi se dobló al ser del 35 por cientu.

Otra manera, nesta ocasión llama l'atención el descensu d'audiencia de la misa de Cuadonga esi mesmu 8 setiembre, que baxó del 20 por cientu de los años últimos a una cuota de pantalla del 4,8 por cientu.

Contador Estadistiques