Los Berrones toquen nos Güevos Pintos

La Pola Siero celebra esti martes los Güevos Pintos dientro d'unes xornaes festives nes que s'inclúi la 'Semana del Folclore Astur'.

La fiesta principió al meudía cola bendición de los güevos pintos na plaza de la Casa Conceyu, anque enantes, a les 11 –y hasta 14 hores– na sala d'esposiciones de la Casa Cultura, l'actividá comenzó col matasellos que Correos concede al Grupo Folclórico y de Investigación El Ventolín. Tres l'actu inaugural, va espichase un tonel de sidra y entamase cola fiesta, na que se podrán mercar los güevos pintaos con diferentes motivos.

A les 17.30 hores ta previsto'l tradicional desfile per La Pola Siero, na que van participar Los Sidros y La Comedia de Valdesoto, El Ventolín, la carroza Muyeres, l'Agrupación Folklórica La Sidrina, La Bandina de Les Campes, l'Asociación Folklórica El Piñote, el Grupo Folclórico Principado, l'Agrupación Folklórica Cuélebre, la Banda Gaites Xiranda 'Belenos', l'Agrupación Folclórica San Félix de Valdesoto y la carroza de la Reina de las Fiestes. Pa finar, a partir de les 20.30 hores, va tener llugar la verbena na cai Alcalde Parrondo, cola actuación de la orquesta Nueva Banda y Los Berrones, formación na que Miguel Herrero sustitúi a Chema Fombona na batería, fináu n'avientu a los 46 años d'edá.

XXXVII Semana del Folclore Astur

El Ventolín celebra estos díes la XXXVII Semana del Folclore Astur, que nesta ocasión ta dedicada a la mitoloxía. Mañana va celebrase la representación de la obra de teatru ''Tu, yo... y el vecín', a cargu de Teatro Carbayín (Auditoriu de Siero, 20.30 hores), con entrada a 3,5 euros, mentes que'l xueves na sala de cámara de la mesma instalación va celebrase el conciertu participativu 'Cantares tradicionales y populares' (20 hores).

L'actividá va continuar el vienres cola puya d'obres d'arte (20 hores) na mesma sala y el sábadu, otra vegada nel Auditoriu y a la mesma hora, va tener llugar el XXXVII Festival Folklórico Internacional d'El Ventolín, cola participación de la propia formación llocal, de la Escuela de Música Tradicional El Ventolín, deel Grupo de Baile Tradicional Sedeiro (Zamora) y d'Héctor Braga.