Los Berrones repasen en Xixón los sos 30 años con ‘L’Asturies que berra’

La Plaza Mayor de Xixón, en plena Selmana Grande, va acoyer esti llunes ‘L’Asturies que berra’, propuesta cola que Los Berrones van celebrar los sos 30 años sobre los escenarios xunto col so públicu. El periodista Pachi Poncela va introducir, ún a ún, los cantares más míticos de la banda de Tolivia nuna cita irrepetible.

Los Berrones, el primer grupu que llevó la llingua asturiana a les radiofórmules estatales gracies al ‘Nun yes tu’, celebren esti 2019 los 30 años de la espublización del so primer discu ‘Voy dicítelo’, onde apaecía’l popular cenciellu que grabaren un añu enantes. Trés décades de ‘agro-rock’ que güei van resumise en Xixón nuna propuesta novedosa pa compartir colos sos munchos siguidores de dientro y fuera d’Asturies.

‘L’Asturies que berra’, según apunten dende la banda, va ser un conciertu únicu nel que Poncela, periodista de llarga trayeutoria qu’anguaño trabaya nos micrófonos de RPA, va facer una introducción de los cantares nuna actuación na que nun va faltar la improvisación y les sorpreses. 30 años de cantares que tamién van ser un repasu de la historia d’Asturies nesti tiempu.

La cita va ser a les 21 hores na Plaza Mayor dientro de la programación del Conceyu con motivu de la Selmana Grande.

Semeya obra de Rafa Caballero.