Los Berrones recueyen nun diccionariu términos y espresiones qu'apaecen nos sos cantares

‘Diccionariu berrón’ (A Mansalva) ye un llibru que recueye “términos y espresiones berroniles”, o lo que ye lo mesmo, qu’apaecen nos cantares de Los Berrones. Una espublización con munchu humor que cuenta con ilustraciones d'Ernesto García del Castillo 'Neto' y comentarios de persones destacaes en dellos campos, como David Villa, Marisa Valle Roso, Montse Tomé o Pablo Texón, ente otros.

“Nun se trata de facer un diccionariu completu nin rigurosu sinon más bien d’aclariar el significáu d’una riestra llarga de términos”, apunten dende la banda, que cumple 35 años, sobre un proyeutu que vienen presentando dende’l 11 d’avientu Ramón Blanco y Olegario Méndez con vídeos curtios en redes sociales que dediquen a una pallabra del ‘Diccionariu berrón’. Cagar en focicu, tená, calamocanu, atrullar, broza, fartón o guchu son dalgunes de les incluyíes nel llibru, un llistáu nel qu’empleguen en munches ocasiones la forma dialeutal propia de Llaviana.

“Normalmente, dase una acepción o más d’una de les que podamos topar n’otros diccionarios; pero lo principal ye indicar el significáu que la pallabra o espresión tien nuna canción concreta, faciéndolo d’una manera munches veces coloquial y teniendo en cuenta que tamién se xuega colos dobles sentíos”, espliquen. Tamién apaecen comentarios respeuto a delles pallabres firmaos por persones destacaes en campos diversos, casu de Texón, Aitana Castaño, David Castañón, Villa, Tomé, Álex Galán y Marisa Valle Roso.

Les persones interesaes en mercar el ‘Diccionariu berrón’ pueden facelo nes llibreríes Campoamor d’Uviéu, Xixón, Avilés, Siero, Mieres, La Felguera, Sama, L’Entregu y Llaviana, y na web del Grupo A Mansalva a un preciu de 15 euros.