Los Berrones recibe un homenaxe polos sos 30 años de vida

|

Tolivia va acoyer esti sábadu un conciertu de 8 hores de llargor nel que participen artistes y grupos asturianos de dellos estilos. Los llavianeses van axuntar la formación orixinal.

Ramón Blanco y Olegario Martínez, miembros actuales de Los Berrones, van tornar a compartir escenariu con Tante Blanco y con Rubén Buelga, ésti últimu depués de venti años ensin tocar la batería, pa esta cita tan especial entamada pola Asociación Cultural El Cascayu pa homenaxar a los sos paisanos. Xunto a ellos nel conciertu participarán músicos que pasaron pola banda nestos trenta años, convirtiendo esti eventu una xornada mui especial pa una de les formaciones referentes del rock n’asturianu.

Los Berrones principiaron a tocar nel 1985, anque’l gran saltu nun lo dieron hasta 1988. Foi nesi añu cuando ganaron el concursu de maquetes de Los 40 Principales con ‘Nun yes tu’, cantar que-yos catapultó a la fama inclusive a nivel estatal. A partir d’ehí llegaron siete discos, un recopilatoriu y un direutu na esplanada de la sablera de Poniente na Selmana Negra de Xixón que yá ye parte de la historia de la música del país.

Pa reconocer esta trayeutoria, artistes y bandes asturianes van participar mañana nun conciertu con aniciu previstu pa les 18 hores y que va allargase, polo menos, ocho hores. Caún va actuar alredor de media hora, col orde siguiente: Banda Gaites LaKadarma, Pop Piquiñín, El Hombre más Tonto del Mundo, Bandina En Madreñes, Degañan’s, La Bonturné, La Abadía de Tolivia, Los Berrones, Desakato, GPS, Jandrix Band, Pablo Moro y Ramón Blanco, Los Berrones, Luis Núñez y Los Folgazanes, Johny Penicilina y Los Frixuelos Eléctricos, Stukas, Stroza, UHP y Los Berrones. Amás tán previstes delles collaboraciones, como la de Miguel Fernandi ‘Burilo’ y Toli Morilla, y munches sorpreses.

Autocares de baldre dende La Pola

Pa facilitar l’asistencia de públicu al homenaxe a Los Berrones, la organización pon autocares d’Alcotán de baldre dende La Pola Llaviana hasta Tolivia, con salida de la parada del CIDAN. Éstos van salir a les 17.30, 18.30, 19, 19.45, 20.30, 21.15, 22 y 22.45 hores. Los horarios pa tornar son los siguientes: 17.45, 18.45, 19.15, 20, 20.45, 21.30, 22.15, 23, 1.30, 2.30 y 3.30 hores. Recomiéndase facer usu d’esti serviciu énte la cantidá de xente s’espera na cita de mañana.

Contador Estadistiques