Los bares de la emigración asturiana en Bruxeles, retrataos nun llibru del valencianu Pablo Casino

Tres dos o trés meses parando nos bares d’emigrantes de dellos territorios del Estáu mientres una estancia en Bruxeles, el fotógrafu valencianu Pablo Casino decatóse de qu’esos llugaren sobrevivientes daben pa contar una historia. Asina nació ‘Barespagnol’, llibru onde Asturies tien un pesu importante.

“En Bruxeles atopé andaluces, non munchos, pero que se faen notar; lleoneses; madrilanos; gallegos…, pero la comunidá más importante ye l’asturiana”, afirma’l so autor, que vivió un añu na capital belga ente’l 2012 y el 2013. La importante emigración d’asturianos mientres les décades de los 60 y 70 provocó la creación de decenes de negocios, sobre manera chigres y tiendes, nos que se reuníen y trataben d’amenorgar la señardá.

D’ellos entovía siguen abiertos el Centro Cabraliego, el Picos de Europa, el Centro Asturiano o’l Turón, mientres que’l Principado zarró les sos puertes “hai un par d’años”. El Centro Asturiano foi onde más semeyes sacó Casino, tanto al chigre en sí como a los sos parroquianos, xente xubilao o cercana a la xubilación cola vida fecha en Bélxica y ensin intención de tornar al so país de nacencia. “Dalgunos colos que charré reconocíenme que cuando veníen a Asturies, que lo facíen tolos años, sentíense daqué estraños”, apunta.

A Asturies de visita foi precisamante’l fotografu valencianu esti branu, lo que-y valió pa comprobar nun viaxe de vuelta a Bruxeles y a estos chigres, qu’éstos “son tan Asturies como la propia Asturies”. “Más allá de tópicos, atopé los mesmos pinchos, les mesmes camisetes y símbolos del Sporting y del Uviéu, semeyes de bolos…”, apunta Casino, que destaca un xueu de rana ente les fotografíes del so trabayu: “Hai equipos entovía, anque non tantos como nel pasáu”, esplica.

Restos d’un pasáu condenáu al desaniciu. “Los fíos d’estes persones siguen amosando ciñu a Asturies y siéntenlo como propio, pero yá nun tienen la necesidá de parar per estos sitios como los sos padres”, afirma l’autor d’esti interesante trabayu fotográficu.

Autoedición

‘Barespagnol’ trátase d’una autoedición de Casino, con tiraes de cien exemplares, que vende en delles plataformes on line o na so propia páxina web. Nel llibru, amás de les fotografíes d’estos chigres y tiendes, van atopar testos del asturianu Julián Ayesta, diplomáticu de la época, y de Julia Faure.

La xente interesao n’alquirir un exemplar, a un preciu de 25 euros más gastos d’unvíu, pue contautar col autor al traviés del corréu electróniu pablo@pablocasino.es.