Los autobuses urbanos de Xixón comiencen a usar biodiésel al 30 por cientu

|

Tola flota d’EMTUSA utiliza dende esti martes un 30 por cientu de biodiésel, lo que va suponer una aforru d’unes 1.400 tonelaes de dióxidu de carbonu añales. La introducción d’esti biocombustible principió a mediaos del 2010.
 
Dende entós, foi incrementándose’l porcentaxe de biodiésel dende un 10 por cientu del total de combustible hasta llegar al 30 por cientu actual. D’esta forma, al reducir el gasoil, más contaminante, tamién mengüen los gases d’efeuto ivernaderu a l’atmósfera, especialmente’l dióxidu de carbonu. Nesti sen, según anuncién dende la Empresa Municipal de Tresportes Urbanos de Xixón (EMTUSA), van aforrase “una media anual d’unes 1.400 toneladas de emisiones de CO2”.
 
Los autobuses municipales, pa nun tener que disponer d’un puntu esternu de distribución de biodiésel, reposten nes instalaciones de la empresa nel polígonu de Los Campones. Ellí, EMTUSA dispón de tres tanques con una capacidá de 60.000 llitros cada ún preparaos p’almacenar biodiésel. Dende la empresa aseguren que mantienen “un compromisu constante cola eficiencia enerxética y el mediu ambiente, tanto col usu de biodiésel como a traviés d’iniciatives como la renovación periódica de la flota, adquiriendo vehículos dotaos de motorizaciones d’última xeneración que cumplen les regulaciones europees más estrictes en materia d’emisión de gases”.

Contador Estadistiques