Los árbitrios, una llaceria pal Farho Xixón Baloncestu

Los árbitrios estropiaron un partíu, que llegaba empatáu nos caberos segundos, pitándo-y a los locales trés faltes antideportives y una técnica desalificante al entrenador.

Facía munchu tiempu que nel campu xixonés nun se vía un arbitraxe tan parcial y llaceriosu pal Farho Xixón Baloncestu. Por ello hai qu'entamar pel final y contar que cuando faltaben 23 segundos 9 décimes y con un empate a 89 nel marcador, una personal de Roberto Morentin sobre Antonio Reynolds interpretáronla los árbitrios como antideportiva. Reynolds encestó los tiros llibres y na siguiente xugada pitáron-y otra personal antideportiva a Chus Poves sobre Sergio Rodríguez, faltaben 22 segundos pa finar y l'enfadu xeneralizáu del públicu yá yera evidente. Rodríguez tamién encestó y punxo un 89-93 nel marcador. Darréu, Wolfram fízo-y una personal a Anthony Stacey a 12 segundos 20 décimes y ésti tamién tresformó los tiros llibres. El desastre siguió na siguente xugada al facer Wolfram pasos y señalase nel ataque de los mallorquinos falta de Fisher sobre Riera. Foi entós cuando Diego Tobalina entró nel terrenu xuegu yendo pa contra ún de los árbitrios, pilancándolu los entrenadores ayudantes del Farho Xixón. Faltaben 6 segundos 9 décimes, y a consecuencia d'aquello pitáron-y una técnica descalificante. Riera metió ún de los dos tiros llibres y nel siguiente ataque llegó otra antideportiva de Morentin a Alberto Galarreta. faltaben 3 segundos 7 décimes y el xugador quedaba elimináu. Galarreta tresformó los tiros llibres y punxo el 89-98 definitivu. Darréu volvió a sacar el Drac Inca y Rod Brown, con bon criteriu, dedicóse a a botar el balón pa que finara'l partíu y que nun fuera a más l'escándalu del públicu y de los xugadores locales.

El partíu entamara bien pa los xixoneses con un primer cuartu nel que ganaron por cinco puntos y nel que Wolfram metió 11 puntos y Fisher 6. Nesti primer cuartu`l Farho Xixón llegó a tener diferencies d´hasta 12 puntos, con un 19-7, anque los fallos n´ataque de los locales ficieron que faltando un minutu l´equipu foriatu s´averara hasta los 4 puntos. Dempués un triple de Poves y dos tiros llibres encestaos por Albero Galarreta dexaron un 29-24, que Francis Koffi nun foi a desfacer na última xugada, dempués de ganar dos rebotes.

Nel segundu cuartu Wolfram fizo bien ceo la segunda personal, faltaben 8 minutos y 20 segundos pa finar el cuartu y yá nun volvió a salir hasta`l segundu tiempu. Ello foi determinante nel desendolque del cuartu pues, anque `l Farho Xixón siguía perdelantre nel marcador, el Drac Inca averábase y púnxose, per primera vegada, delantre nel marcador con un 41-42, faltando 2 minutos pa finar. Esti finó con un 44-47 pal equipu foriatu. Hai dos fechos perimportante nel desarrollu`l cuartu: que Wolfram xugara namás que 1 minutos 40 segundos y que les rotaciones nun funcionaran.


Nel tercer cuartu los locales escomencipiaron averándose hasta poner un empate a 51, faltando 7 minutos 35 segundos. Dende esi momentu los xixoneses pónense perdelantre con diferencies d´hasta 8 puntos, con un 66-58 faltando 2 minutos, y ganen el cuartu con un 73-68.

Nel últimu cuartu l´equipu xixonés diba delantre con pequeñes diferencies, en dalgún momento d´hasta 6 puntos con un 78-72, hasta llegase a un empate a 80 a 3 minutos 20 segundos, que ruempe Fisher con un triple, dempués vuelve otru empate a 85 y dende ehí al final les coses tán igualaes con empates y pequeñes diferencies de 2 puntos pal Farho Xixón hasta llegar a esi empate a 89 que yá cuntáramos enantes.

Nel equipu xixonés el meyor foi Brando Wolfram (24 puntos, 10 rebotes, 1 tapón, y ficiéron-y 4 personales), tamién hai de destacar el llabor de Josh Fisher (20 puntos, 4 rebotes, 1 asistencia, 3 balones recuperaos, 1 tapón y ficiéron-y 3 faltes personales) y Chus Poves (17 puntos, 3 rebotes, 1 asistencia, 1 balón recuperáu, ficiéron-y 3 faltes personales).
Nel Drac Inca`l meyor foi Antonio Reynolds (20 puntos, 9 rebotes, 4 asistencies, 3 balones recuperaos, 4 tapones y ficiéron-y 6 personales). Otros xugadores destacaos nos baleares foron: Alberto Galarreta (21 puntos, 4 rebotes, 1 asistencia y ficiéron-y 6 faltes personales), Anthony Stacey (22 puntos, 4 rebotes, 2 balones recuperaos, ficiéron-y 4 faltes personales) y Rod Brown ( 20 puntos, 3 rebotes, 4 asistencies, 2 balones recuperaos y ficiéron-y 4 faltes peronales).

Alliniaciones:


Farho Xixón Baloncestu: Josh Fisher (20), Chus Poves (17), Mark Bigelow (5), Roberto Morentin (6) y Brandon Wolfram (24). Tamién xugaron: Antxon Iturbe (5), Rubén Suárez (3), Iñaki Narros, Juan Ignacio Jasen (5) y Francis Koffi (4).


Drac Inca: Rod Brown (20), Marc Blanch, Anthony Stacey (22), Antonio Reynolds (19) y Alberto Alzamora (3). Tamién xugaron: Sergio Rodríguez (7), Óscar Rodríguez (5), Juan Francisco Riera (1), Alberto Galarreta (21).


Árbitrios: Marc Tortella (Colexu catalán) y Juan Carlos Rodríguez de Rada (Colexu canariu). Eliminaos nel Farho Xixón Baloncestu, Roberto Morentin (minutu 39), por cinco personales dos d´elles antideportives, polo que tuvo que dir a los vestuarios, y Diego Toblaina, por técnica descalificante; el Drac Inca nun tuvo eliminaos. Unes 2500 persones nel Palaciu los Deportes de la Guía de Xixón.
Parciales per cuartos: 29-24, 15-23, 29-18 y16-33.