Los Alcuentros de Músiques Asturianes centren esta edición nel trabayu de los cantautores

Xaime Martínez y Toli Morilla abren esta selmana los Alcuentros de Músiques Asturianes, que van tar dedicaos a los cantautores. Cuatro centros municipales de Xixón van acoyer los doce conciertos de seis artistes asturianos ente los meses d’ochobre y payares.

El creador del esitosu ‘Ósculos d’agua nel Imperiu Asturianu’ –discu editáu por Araz, empresa editora tamién d’Asturies.com– inauguró esta edición ayeri nel Centru Municipal Integráu d’El Llano y va repetir el martes 22 a les 19.30 hores nel de Pumaría Xixón-Sur. Mientres, Morilla va tocar esta tarde a les de 19.30 hores nel Atenéu de La Calzada, con una segunda cita prevista pa la mesma hora del 15 de payares nel de L’Arena.

Rafa Lorenzo (Pumarín-Xixón Sur, día 17; y El Llano, día 24), Ún de Grao (La Calzada, día 18; y L’Arena, 8 de payares), Alfredo González (Pumarín Xixón Sur, día 29; y L’Arena, 22 de payares) y Alicia Álvarez & David Varela (La Calzada, día 30; y El Llano, 13 de payares), colos cantares de ‘Bestiariu’ –tamién editaos por Araz– son los otros artistes que van participar nos Alcuentros de Músiques Asturianes. Tolos conciertos son a les 19.30 hores, a esceición de los dos de ‘Bestiariu’, que van principiar a les 18 hores.

Con esta iniciativa entamada dende’l Conceyu preténdese “poner de relieve’l trabayu de los cantautores, o d’artistes que puean tar cerca d’esta etiqueta, ‘cantantes-autores’ qu’amuesen les sos composiciones propies en formatos cenciellos y cercanos, nesti casu cola música, la cultura tradicional y la llingua asturiana como referencia próxima”.