Los Alcuentros de Músiques Asturianes amuesen el trabayu fechu por muyeres dende la tradición

|
Cartelu Alcuentru de Músiques Asturianes 'Elles'

Siete grupos participaos por muyeres actúen nos Alcuentros de Músiques Asturianes, que programen once conciertos y cuatro talleres de baille en Xixón esti ochobre y payares. Herbamora va encargase d’abrir esta edición que lleva por títulu ‘Elles’.

Ésta ta “dedicada a elles, al trabayu de les muyeres na música tradicional, tentando d’amosar aquelles propuestes más innovadores nuna estaya, la musical, onde, tamién, elles tán representaes”. Les panderetes d’Herbamora, que tán preparando lo que va ser el so tercer trabayu discográficu, van actuar a les 19.30 hores d’esta tarde, hora prevista de comienzu de tolos conciertos d’esti ciclu con entrada llibre.

Anabel Santiago (Pumarín-Xixón Sur, el día 16; Atenéu de La Calzada, el 26), Silvia Quesada (Atenéu de La Calzada, el 19), L-R (L’Arena, el 25), Mapi Quinta y Elías García (Atenéu La Calzada, el 30; El Llano, 23 de payares); Lafu y Rebeca (Pumarín Xixón-Sur, el 5 de payares; El Llano, el 9 de payares) y Antón Menchaca (L’Arena, 8 de payares; El Llano, 16 de payares) completen el programa. Amás, como novedá, van entamase cuatro talleres de baille tradicional con música moderna, con comienzu a les 19 hores: el miércoles nel Atenéu de La Calzada, el día 15 en Pumarín-Xixón Sur, el 18 en L’Arena y el 6 de payares n’El Llano.

Contador Estadistiques