Los Aguilandeiros de San Xuan de Villapañada salen a pidir l'aguilandu

La mazcarada d'esta parroquia de Grau ye la primera de la temporada d'iviernu.

L'escobón, les pareyes de maragatos, l'osu, la dama y el galán, el diablu..., esto ye, los personaxes integrantes de los Aguilandeiros de San Xuan de Villapañada salen esti domingu, a partir de les 9.30 hores, a pidir l'aguilandu pela parroquia y los pueblos de la contorna. Una tradición perguapa recuperada nel 2014 tres 70 años d'ausencia y qu'atrái a numberoses persones al llugar.

Tres pidir l'aguilandu, la mazcarada d'iviernu va aportar a campu la ilesia de San Xuan, onde va siguir la celebración tola tarde con cantares y bailles de la mano de Xeitu y La Báscula del Ferreiro, pa facer la función. Los Aguilandeiros de San Xuan de Villapañada ye la primer de les mazcaraes vives de la temporada que se celebra, a la que-y van siguir El Guirria de Ponga, Os Reises del Valledor, Os Reises de Tormaleo y Los Sidros y La Comedia de Valdesoto.