Los Aguilandeiros de San Xuan de Villapañada abren la temporada de les mazcaraes d’iviernu

Tamos en tiempu de mázcares y la primer comparsa en salir va ser, como vien siendo vezu nos años últimes dende la so recuperación nel 2014, la de los Aguilandeiros de San Xuan de Villapañada. La mazcarada d’iviernu d’esta parroquia moscona va pidir l’aguilandu esti domingu per San Xuan, Rozadas, Acebéu y la Llinar.

Facía siete décades que nun s’entamaben, pero’l llabor de Xosé Antón Fernández ‘Ambás’ y Ramses Ilesias entrevistando a los mayores del llugar permitió la recuperación de los personaxes y de dalgunos cantarinos. Asina, nel 2014, cola collaboración del grupu Xeitu y de los mozos de San Xuan, tornaron a percorrer el conceyu la dama y el galán, los maragatos, l’osu y el so amu, la vieya y el vieyu, el cura y el diablu, ente otros, acompañaos d’un gaiteru.

Cinco años depués, la mazcarada yá ta consolidada y son munches les persones de fuera del conceyu que s’averen a disfrutar de la comparsa formada por 17 personaxes. Ésta va salir a les 9.30 hores del albergue de San Xuan xunto con tractores onde pue dir la xente, pa pasar peles cases en direición Rozadas (10 hores), Acebéu (11.30 hores) y La Llinar (14 hores), y finar en San Xuan (15 hores), nel campu la Ilesia, onde va haber una representación.

Yá de tarde, a les 16 hores, va entamase una merienda pa tolos presentes na carpa instalada nel llugar, onde va haber chigre.

El Guirria, el siguiente

Nes selmanes próximes va ser el turnu de dalgunes de les mazcaraes d’iviernu actives n’Asturies. El Guirria de Ponga va salir el 1 de xineru, como fai tolos años, mentes qu’Os Reises del Valledor van facelo’l 4.