Los afeutaos pola llinia d’alta tensión ‘Costa Verde’ convoquen una marcha pal domingu en Serín

El Coleutivu d’Afeutaos pola Llinia Costa Verde va facer una marcha ente La Teyera de Serín hasta’l prau onde Red Eléctrica quier instalar la subestación en Xixón. Mentes, la Coordinadora Ecoloxista presentó alegaciones contra la de Cardo.
 
La llinia d’alta tensión de 400.000 voltios ‘Costa Verde’, que va pasar per Gozon, Carreño, Xixón, Sariegu, Siero, Nava y Bimenes pa conectar con Soto-Penagos, ta teniendo un refugu ampliu ente los vecinos y ecoloxistes. Cola inteción de visibilizar la so propuesta, el coleutivu de afeutaos entama esti domingu una marcha al meudía que sal La Teyera de Serín y que va terminar, sobre les 13 hores, con una xinta nel prau onde ta prevista la subestación de Xixón. Pa ello, anima a los participantes a llevar tortilles, empanaes y otros alimentos pa comelos ellí.
 
Mentes, la Coordinadora Ecoloxista d’Asturies ta acabante d’anunciar que presentara alegaciones al tramite d’información pública de l’autorización alministrativa ante’l Gobiernu d’Asturies nel trámite nuevu d’estudio d’impautu ambiental pa la subestación d’alta tensión de Cardo, en Gozón, qu’ocuparía una parcela de 60.000 metros cuadraos. Esta subestación tamién s’inclúi na llinia ‘Costa Verde’. “Paeznos que l’estudiu presentáu ye nulu de plenu derechu al resultar imprescindible que cualquier estudiu que se faiga tenga en cuenta nun solo les afeiciones series que xenera nel entornu inmediatu onde s’instala la subestación, sinón los efeutos enllazaos que traen estes instalaciones”, señalen dende la Coordinadora, coleutivu qu’añade que “la subestación de Gozón y la llinia que la comunica forma parte d’un proyeutu o un plan más ampliu que supón enllazar tola zona central d’Asturies con llinies d’alta tensión y delles subestaciones –Serín, Reboria o Llangré, ente otrres–”. Amás de los ecoloxistes, los vecinos tamién presentaron 12.000 alegaciones individuales a la subestación de Gozón.