Los afayos arqueolóxicos de Veranes van poder visitase en pasando'l branu

La Fundación Municipal de Cultura del Conceyu de Xixón quier abrir al públicu en pasando esti branu'l yacimientu arqueolóxicu de Veranes, ello dempués de más de diez años de campaña arqueolóxica nos que s'invirtieron más de cinco millones d'euros descubrieren una villa tardorromana que, pol so asitiamientu, revela la importancia de la Ruta de la Plata yá nos primeros sieglos de la nuestra dómina.

Los afayos de Veranes van inxertase nuna rede arqueolóxica del conceyu na que tamién tan les Termes Romanes del Campu Valdés la Torre del Reló y el Parque de la Campa Torres, y van contar con una superficie d'esposición de 500 metros cuadraos y dellos edificios. El conceyu de Xixón ye quien entama esti proyectu que va tener un coste de cerca de 1,2 millones d'euros. Pa llevalu alantre, el Gobiernu asturianu va apurrir 300.000 euros pa los llabores nos restos arqueolóxicos, que van rematar cola construcción d'un centru de recepción de visitantes nel que van esponese los resultaos de les escavaciones en Veranes.

Los afayos de Veranes, na xixonesa parroquia de L'Abadía Cenero, incluyen distintes estructures y construcciones qu'entamen nes dómines postreres del imperiu romanu, espurriéndose la ocupación del llugar hasta l'alta edá media y conseñándose nel yacimientu la esistencia de trabayos metalúrxicos, una basílica y una necrópolis medieval con enterramientos hasta'l sieglu XIII, siendo un casu claru qu'espeya les tresformaciones de lo romano a lo medieval .