Los 25 cursos de branu de l'Academia de la Llingua Asturiana n'Ibias entren na so segunda selmana

Más de 150 persones participen na XXV edición de los cursos de branu de l'Academia de la Llingua Asturiana, que celebren en Santantolín d'Ibias la so segunda selmana. Fontes de l'Academia destacaron esta cifra, dexando claro que'l númberu de matriculaos a esta actividá "medra cada añu".

Na presente edición punxéronse en marcha un total de siete cursos: elemental de llingua, avanzáu de llingua, de gallegu-asturianu, de capacitación pa tornar, d'asturianu na rede, de xuegos y tradición popular y de cine n'asturianu con aplicaciones educatives.

De toos ellos, el que más aceptación tuvo ye l'elemental, un cursu nel que "tolos años se completen toles places dos hores dempués d'abrir la matrícula". Los cursos ofrecíos, sacante l'elemental, oriéntense principalmente a personal enseñante, col oxetu d'aportar a los participantes conocimientos y instrumentos prácticos de cara a impartir llingua asturiana en primaria y secundaria.

El preciu de matriculación d'estos cursos, que suelen tener una duración de 12 díes, ye de 240 euros, cantidá qu'inclúi les sesiones llectives y la residencia en pensión completa, nel centru d'enseñanza d'Ibias nel que s'organicen.