Los ḷḷenizos Spanta la Xente actúen el xueves en Cecea en 'Nava en Vivu'

Spanta la Xente van actuar güei xueves nel Campu de la Ilesia en Cecea (Nava), a les 22 hores. Los ḷḷenizos son conocíos poles sos lletres reivindicatives n'asturianu, que se convirtieron na música de fondu de les protestes del sector mineru.

El ciclu de conciertos de verano ‘¡Nava en Vivu!’ va cuntar cola presencia de la formación liderada por Saúl Quiñones, que se convirtió nuna de les bandes asturianes más populares de los últimos años. Les sos lletres son n'asturianu, de calter reivindicativu y encetando tamién temes como la mitoloxía asturiana, pero sobremanera convirtiéronse en símbolu de la llucha minera con himnos como 'Canciu'l mineru' o 'Díes de barricá'.

El grupu procedente de La Pola Ḷḷena, apadrináu pol ex Nuberu Chus Pedro, apaeció na escena musical asturiana en 2009 col discu ‘Fíos d’esta tierra’. Los sos integrantes, que se definen como un grupu d'amigos, vienen de distintes fonderaes musicales y esto resulta nun amiestu de folk, rock, pop, ska, reggae, que tampoco desprecia lo tradicional. El so primer álbum superó les 2.500 copies vendíes, y pola so tema ‘Letavia’ recibieron el premiu de la Música Asturiana (AMAS) al meyor cantar folk. El so últimu discu, ‘Alienda’, salió a la venta nel 2011 y nél traten l'asuntu de la variante de Payares y la destrucción causada na redolada natural del conciyu de Ḷḷena por causa de dichu proyeutu.

‘¡Nava en vivu!’ ye un ciclu de conciertos entamáu pol Conceyu de Nava que, amás de potenciar el turismu y el comerciu llocal, pretende dar protagonismu a grupos asturianos ufiertando una seleición pa tolos públicos y reivindicando la meyor música asturiana d'anguaño, como Alexandra In Grey, Spanta la Xente, Petit Pop o Blues & Decker; xuntu con clásicos como Toli Morilla, actuación qu'inauguró'l ciclu'l pasáu 9 d'agostu.