Los ástures tornen a defender Carabanzo de les lexones romanes

|

El Festival Astur Romanu de la población ḷḷeniza sigue medrando y nesta edición va contar con 11 grupos de recreación histórica. El sábadu va celebrase la ‘Nueche Ástur’ con Dixebra, Spanta la Xente y Skontra.

La Legión V Alaudae de Mieres, la Guardia Pretoriana de Lugo, A Castronela Friol y Lucus Equites –tamién de Lugo–, Ludus Bergidum Flavium de Cacabelos, l’Asociación de Guerreras Cántabras, Hijos del Lobo, Hermanos de Armas de Arnedo de La Rioja, Lancienses d’Estorga y Gaebolgh de Vallecillo, amás de la organizadora Asociación Cultural Jóvenes de Carabanzo, son les formaciones que van participar esti añu na folixa más orixinal de les que se celebren nel branu asturianu. Un emburrión más a la celebración que cumple diez años y que tien el so momentu más destacáu’l domingu a les 14 hores, hora prevista de la confrontación ente les tribus ástures y les lexones romanes, que congrega a miles de persones en Carabanzo.

La fiesta principió esta mañana cola apertura del tabernarium y va tener la so primer actividá a les 23 hores con una ‘Nueche de baille’ cola orquesta Clave de Sol. Mañana les tribus ástures van congregase nel pueblu conscientes de la presencia de lexones romanes cerca de La Carisa. Dende les 11 hores el pobláu ástur va tar activu y a les 13.30 hores los caudillos de les tribus ástures procedented de dellos puntos del territoriu van roblar un pautu d’hermanamientu pa defender les sos tierres de Roma.

Pela tarde, los neños van ser protagonistes, ayenos al ambiente de batalla esistente que va agravase a les 21 hores, cuando Roma va executar al líder llocal. Tres l’entierru con honores, previstu pa les 22 hores, los ástures proclamarán un líder nuevu y la guerrera Imborg reclamará venganza. Darréu, a les 23 hores, preparán la batalla del domingu con una ‘Nueche Ástur’ na que repiten Dixebra y los llocales Spanta la Xente, y na que s’incorpora esti añu Skontra. La folixa va allargase hasta bien entrada la madrugada de la mano del DJ Nacho Otero.

L’enfrentamientu

El domingu inaugúrase a les villa romana a les 12.30 hores, esperando la pronta llegada de César Augusto. Media hora depués van bendecises les lexones, que tomen direición al altu del pueblu, onde esperen los ástures pa defender con sangre’l so territoriu. Ehí, a les 13.45 hores, fadrán una plegaria a los sos dioses enantes del enfrentamientu. La programación del festival continuará pela tarde hasta la medianueche, cuando va zarrase’l tabernarium.

La organización, pal disfrute de la fiesta, pon autocares dende Mieres, Uxo y La Pola Ḷḷena, tanto’l sábadu como’l domingu. Ésti va tener el preciu simbólicu de 1 euru. D’igual forma, habilitaráse la habitual zona d’acampada p’aquellos que quieran facer nueche en Carabanzo. Otra manera, los responsables del Festival Astur-Romanu animen a toles persones a acudir a la fiesta carauterizaes, yá sían d’ástur o de romanu.

Contador Estadistiques