Los ástures tornen a defender Carabanzo de les lexones romanes

Carabanzo yá ta preparada pa congregar a les tribus ástures que se dirixen a la población ḷḷeniza pa defender el territoriu de les lexones romanes. Trátase del Festival Astur Romanu, nel que van actuar Skama la Rede, Spanta la Xente y Lurte.

Esta folixa, una de les más prestoses y quiciabes la más orixinal del calendariu festivu asturianu, vive la so octava edición y espera a congregar en Carabanzo a centenares de visitantes mientres los trés díes de celebración. Xente antroxao d’ástures y romanos van animar esti pueblu del conciyu de  Ḷḷena que yá ta carauterizáu como un pobláu astur. Güei, xornada inaugural, ye’l día de la congregación de les tribus astures nel llugar col finxu d’enfrentase a les lexones romanes que tán cerca del llugar. Desconocen cuándo será la batalla, pero ésta yá tien fecha marcada: el domingu a les 13.30 hores.

L’Asociación Cultural Jóvenes de Carabanzo tien preparaes decenes d’actividaes pa estos trés díes de fiesta que pretende recordar les batalles de los romanos contra los ástures d’hai 2.000 años. Asina, esta tarde, a les 19 hores, van abrise los festexos cola bienvenida a las tribus ástures, a lo que va siguir el llamamientu de la guerrera Imborg a la xunidá pa plantar cara a les lexones romanes de Publio Carisio. Tamién, a medianuche, los ástures van invocar a los dioses de les fuercies naturales, yá que toda ayuda na batalla ye poca. De manera paralela, va celebrase la ‘Nueche del truenu’, con una sesión de música de pachanga (22 hores) y de techno (00.30 hores), con DJ Pablo, DJ Yeyo, DJ Fernando Valverde y DJ Héctor Llamazares a los platos.

Mañana, al meudía, va abrise’l pobláu astur y va tener llugar el pautu de les tribus tramontanes y cismontanes pa vencer al invasor. A les 13.30 hores, ta prevista la llegada de Gausón El Terrible y, yá de tarde, a les 17 hores, los visitantes van poder disfrutar de xuegos ástures. Ún de los momentos más esperaos ye la Nueche Ástur (00 hores), como celebración previa a la batalla del domingu, na que van repetir los aragoneses Lurte –tamién van reforciar a los ásturies na llucha–, que van compartir escenariu con Spanta la Xente y Skama la Rede. La folixa va allargase hasta l’alborada con una discoteca móvil.

La batalla

L’apertura de la villa romana, al meudía, va dar aniciu a la xornada final del VIII Festival Astur Romanu. El desfile de les tropes romanes por Villa Carabantius va preceder a la batalla prevista nun prau asitiáu enrriba’l pueblu, un acontecimientu que va principiar a les 13.30 hores y qu’axunta a decenes de persones nel llugar. Darréu, los visitantes van poder disfrutar d’un menú galaicu a un preciu de 25 euros compuestu por empanada gallega, pulpu, llacón, Ribeiro, postre y café, anque pa ello hai que reservar de manera anticipada en los establecimientos hosteleros de Carabanzo. Les actividaes van continuar tamién a lo llargo de la tarde.

Les persones interesaes en disfrutar d’esta folixa van disponer d’un prau nel pueblu p’acampar de baldre. La organización tamién pon autocares gratuitos pa desplazase a Carabanzo dende Mieres, Uxo y La Pola Ḷḷena, y tornar a los sos domicilios, con horarios que se pueden consultar na páxina del ‘Festival Astur Romano Carabanzo’ de la rede social Facebook.