L'Ochobre Folk cambia al parque Xovellanos

El festival mierense de baille y la música tradicional presenta trés xornaes d'actividaes.

El Grupu Folclóricu Prau Llerón de Mieres entama dende güei y hasta'l domingu'l IX Ochobre Folk. Un certame que nació cola idea d'apurrir un espaciu d'alcuentru y divertimentu al rodiu'l baille y la música tradicional del país, y que foi consolidándose añu a añu.

Nesta edición la gran novedá ye'l cambiu del CP Aniceto Sela al parque Xovellanos, ganando en centralidá y visibilidá. Nuna gran carpa nel llugar van celebrase toles actividaes, que van dende charres a talleres, pasando per conciertos.

Entes les actuaciones rescampla la de Salón Bombé d'esta nueche, a les 23 hores; el vermú del país con canción asturiana de mañana a les 14 hores, con Alicia Villanueva, Carlos Velasco y Fran Pola; la Nueche en Danza de les 23 hores con Os Da Porfía y La Garrapiella; y el pasucasi de Los Gascones el domingu a les 13,30 hores. Mañana a les 18 hores va celebrase l'alcuentru folclóricu, cola participación de Prau Llerón, la Banda Gaites La Laguna del Torollu y los gallegos Agrupación Folklórica Ximiela Louro.