Lo nuevo del ordenador más espurríu

Cuando en 1976 Steve Wozniack y Steve Jobs, dos programadores de xuegos que trabayaben pa la casa Atari, crearon el primer ordenador Apple, nun podíen saber que taben llantando la primer piedra na historia de la casa que diba fabricar los ordenadores más esclusivos del mundu. Más de venticinco años depués, los Apple MacIntosh son entovía los ordenadores que más aprecien profesionales y amateurs que puedan pagar lo que cuesten la calidá y el diseñu de vanguardia d'esta plataforma, la única que resistió la invasión del PC a mediaos de los 90 y que, pa munchos, sigue yendo un pasu per delantre de los demás ordenadores. La xente "mackero" pue esfrutar dende güei colo más nuevo d'Apple na MacWorld de San Francisco, onde van vese novedaes que van da-y otru aquello a la trayectoria d'Apple. Por poner un casu, en tema de software, Apple ta acabante de preparar un navegador nomáu Safari que presume de ser más rápidu que'l Explorer de Microsoft, pero la pena ye que namás funciona sobre plataforma MacIntosh, caro qu'eso podría tener bona igua en cuantes la casa de la mazana acabe de preparar "Marklar"una versión del sistema operativu col que funcionen los MacIntosh, célebre polo estable que ye, pa poder instalala en PCs. Otres novedaes de la Mac World van ser de hardware, como'l primer ordenador portatil con pantalla de 17 pulgaes, que yá ta confirmáu, pero anque nun se confirmó, decíen que la estrella de la feria diba ser la versión nueva del iPod, un complementu que, abultando como una caxa de cerilles ye capaz d'almacenar un estoyu d'hasta 20 xb d'archivos de música pa escuchalos como con un walkman. Ello ye que dicen la versión remocicada del iPod podría venir con una pantalla pa reproducir archivos de vídeo. Habrá qu'esperar.

Contador Estadistiques