“‘Lluna d’abril’ busca apurrir a los coros una coleición de pieces corales nun asturianu cuidáu”, apunta Rubiera

El Coru Capilla Polifónica Ciudad de Oviedo va intepretar esti xueves nel Filarmónica ocho de les doce composiciones corales de Carlos Rubiera pal so llibru ‘Lluna d’abril’. Esta obra “busca apurrir a los coros asturianos una coleición de pieces corales nun asturianu cuidáu” frente a un repertoriu tradicional principalmente “n’amestáu”.

“Ye un llibru que ruecueye 12 pieces pa corales, canciones iguaes pa cantar a 4 o 5 voces”, esplica’l cantautor. Editáu pola Academia de la Llingua Asturina (ALLA), conformándo’l númberu 16 de la coleición ‘Collecha Asoleyada’, inclúi en total 13 partitures, yá que pal so ésitu ‘La capitana’ presenta una pa 4 voces y otra pa 5.

Cada partitura acompáñase cola lletra y una introducción de cada tema, la gran mayoría composiciones nueves –namái ‘La capitana’ y ‘Virxe de Guía’ son canciones vieyes de Rubiera–. Del total 6 son habaneres, entes les que rescampla ‘De Candás a Torrevieja’, “una canción mui pegadiza que pue tener un ésitu asemeyáu a ‘La capitana’” y que va sentir en direuto la propia alcaldesa de Carreño, Amelia Fernández López.

Tamién rescamplen otres más clásiques como ‘Cuando pienso’, una versión llibre del ‘Va, pensiero’ de Verdi, o un ‘Ave María’, de calter menos popular. Cantares que se van poder sentir nel conciertu de presentación del xueves qu’entama la Conseyería de Cultura, Política Llingüística y Turismu nel uvieín Teatru Filarmónica, a les 20 hores, con entrada llibre hasta completar aforu.

Les ocho pieces escoyíes

Rubiera divide l’actuación en trés partes, que va introducir él personalmente al públicu. En primer llugar van interpretase dos cantares populares a cappella, ‘La ponte que pasa’l Seya’ y ‘Virxe de Guía’, pa depués dar pasu a les más clásiques ‘Ave María’ y ‘Cuando pienso’, a 5 voces, col acompañamientu de l’acordionista asturiana afincada en Galicia, María Álvarez Santiago.

Tamién va tocar xunto al Coru Capilla Polifónica Ciudad de Oviedo na tercer parte, compuesta poles habanera ‘De Candás a Torrevieja’, ‘Americanu del pote’, ‘Rei del pantalán’ y ‘La capitana’. “Tuvi presente nel ensayu del miércoles y tán faciendo un trabayu estraordinariu, que supera la espeutativa que tenía na mio cabeza”, aseguró’l xixonés.

Nun primer momentu pensó na Coral Villa Blanca de Ḷḷuarca, pero la imposibilidá de preparar un reportoriu nuevu nun mes como agostu nel que l’agrupación nun ensaya llevó al so direutor David Colado a contauta-y col del coru uvieín, José Manuel San Emeterio, un aciertu pa Rubiera. L’ALLA encargóse de convidar a toles corales asturianes pal conciertu y regala de baldre’l llibru –qu’inclúi una introducción so presidente Xosé Antón González Riaño y del presidente de la Federación de Coros de Asturias (FECORA), Marcelino Martínez ‘Santi’, amás d’una antoxana de Rubiera– a les que pasen pel so llar nel oxetivu de “difundir esti repertoriu ente la familia coral asturiana”.

“‘Lluna d’abril’ busca apurrir a los coros asturianos, o d’onde sían, una coleición de pieces corales que, teniendo interés musical, tengan l’interés añadíu de tar escritu nun asturianu cuidáu”, fuxendo asina d’un repertoriu coral tradicional asturianu “n’amestáu o en castellanu con dialeutismu asturianu”. La intención de Rubiera ye que les corales “escuchen estes composiciones y, si-yos presta, vayan incorporándoles al so repertoriu”.

Poemariu y novela

Esti trabayu aporta un añu y mediu depués del ‘30 asturianaes’, una gran obra en formatu llibru, acompañada de 3 CD, asoleyada por Rubiera con Goxe Producciones. El de Garbelles de Baxo nun apara y cuenta con asoleyar a lo último d’esti añu un poemariu con Trabe de nome ‘Memoria del futuru’, amás de trabayar anguaño nuna novela que tien mediada.

Tamién tien avanzáu col proyeutu entamáu xunto cola so familia, el de la Fundación Almastur, yá constituyida, qu’espera poner en marcha nos meses próximos. Trátase d’una entidá de calter cultural que, ente otres coses, busca nun futuru cercanu crear una Escuela de la Cultura Asturiana.