Lluis Portal rescata la figura del emigrante a Cuba Carlos Ciaño

|
Cubierta de 'Carlos Ciaño (1855-1925). Ente Cuba y Asturies' de Lluis Portal

El maliayu foi un escritor y periodista de gran sonadía nel país caribeñu, pero malapenes alcordáu o reconocíu n’Asturies.

'Carlos Ciaño (1855-1925). Ente Cuba y Asturies' (Ediciones Trabe) ye'l títulu de la obra última que firma Lluis Portal. Nél céntrase na figura d'esti emigrante nacíu en Villaviciosa y que crució'l charcu nel 1882.

En Cuba nun tardó en ganase un nome dende les lletres y na distancia nun dexó d'emplegar la llingua asturiana. Na so obra lliteraria destaca 'Tipos y topos' (1886), 'Cantares' (1888) y 'El Castillo de Yuros' (1893).

Xunto al so hermanu Álvaro publica 'De Asturias' (1900), recopilación de cuentos de la tradición popular escritos n’asturianu o billingües. Otra manera, de manera póstuma espublizóse'l trabayu 'Costumbres tradicionales asturianas' (1925).

Portal quixo escaziplar a la busca d’información sobre'l so paisanu y como resultáu ta esti rellatu sobre Ciaño, el so tiempo y la so obra. 'Carlos Ciaño (1855-1925). Ente Cuba y Asturies' preséntase esta tarde a les 19.30 hores na Casona de los Hevia, actu entamáu pol Aula d'Asturianu Carlos de la Concha del Atenéu Obreru de Villaviciosa que va contar cola presencia del historiador Senén Rivero y d'Esther Prieto, copropietaria de Trabe.

Contador Estadistiques