#LluchandoPolaSoberanía axunta a conceyales nacionalistes en La Llegra

Pablo Pérez, José Agripino Pérez y Aitor García Corte participen nun alderique previu a les celebraciones del Día de la Nación Asturiana.

Baxo'l nome de 'Esperiencies soberanistes nos conceyos' va desendolcase esti actu qu'axunta a ediles eleutos de Conceyu Abiertu por Noreña y Compromisu por Ḷḷena, amás del alcalde de Bimenes pol Partíu Asturianista (PAS), de manera respeutiva. La hora de comienzu ta prevista pa les 20 hores nel uviedín Llar La Llegra.

Esti eventu ta encuadráu nes actividaes que la iniciativa #LluchandoPolaSoberanía entama con motivu del Día de la Nación Asturiana, que tien como actu principal la manifestación que va celebrase mañana, 8 de setiembre, peles cais d'Uviéu baxo'l lema 'Ganar la cai faciendo país'. Ésta va salir a les 13 hores del Paséu Los Álamos, con final previstu a les 14 hores na Plaza La Corrada l'Obispu, onde va haber una xinta popular, música y xuegos del país.