Llope: “La UABRA nun debería ser una islla docente na Universidá”

Ignaciu Llope protagonizó la primer de les cuatro conferencies previstes dientro de les actividaes de la Universidá Asturiana de Branu (UABRA). El médicu psiquiatra considera que la UABRA “nun debería ser una islla docente na Universidá”.

Na so opinión, la iniciativa de l’Academia de la Llingua Asturiana (ALLA), entamada en collaboración col Conceyu de Cangas y la Universidá d’Uviéu, “ye positiva per se” al posibilitar l’usu normal del idioma en ciencies, humanidaes o cualquier otra disciplina, pero, al mesmu tiempu, considera que “nun debería ser una islla docente na Universidá”. Entiende que la UABRA vien a cubir les carencies qu’hai a lo llargo de tol cursu, polo que demanda que’l modelu que se propón tenga continuidá tol añu.

Llope participó’l martes na primer de les conferencies previstes pa esta edición de la UABRA. Doctor en Medicina especializaú en Psiquiatría, impartió la charra ‘La nueche escura del ser: psiquiatría y sociedá n’Asturies’ énte alumnos, profesores y cangueses que s’averaron al IES llocal. Nella, el tamién escritor fixo una introducción con un llistáu de los munchos términos esistentes en llingua asturiana sobre la enaxenación mental, pa depués continuar con un repás, dende la Edá Media hasta l’actualidá, sobre’l carauter de ‘llocu’ de los asturianos, etiqueta que se daba dende Castilla de manera principal –tovía presente de cierta manera– y que se pue comprobar na lliteratura. Asina, esplicó munchos detalles sobre esta perceición negativa que teníen dende Madrid de los asturianos –que tamién se daba colos gallegos–, con un dalgún exemplu tamién contrariu. Darréu, ocupóse de la historia de l’asistencia psiquiátrica dende’l sieglu XVII, con Gaspar Casal como referencia, y terminó cola esplicación d’una estadística epidemiolóxica de los asturianos correspondiente al añu 2012.

Iniciativa pol Asturianu, presente en Cangas

Al igual qu’asocediera l’añu pasáu, Iniciativa pol Asturianu ta presente en Cangas, onde entama delles actividaes. La primer tuvo llugar ayeri y consistió na grabación del programa de Samuel Gradín ‘Iniciativa pol Asturiana nes Ondes’ nel comedor de la Escuela-Hogar mientres la xinta, y una folixa, yá de nueche, nel Chigre Bambú nel qu’hubo llectura de poemes y música con DJ Lluis. Pal xueves próximu ta prevista una edición nueva de ‘Búscase una estrella. Canta pol asturianu’, na discoteca Zaycor. Amás, la organización tien un puestín informativu permanente con llibros a baxu costu a la venta.