Lliteratura n'asturianu en Burdeos

El próximu día 4 d'ochobre, la Universidá de Burdeos (Francia), dientro
del ciclu tituláu "El territoriu llingüísticu del escritor en llingua
minoritaria", organiza un Seminariu Internacional tituláu "Modalidaes
d'escritura en relación col territoriu llingüísticu nes lliteratures
actuales n'asturianu y n'occitanu". Participen na organización la Rexón
d'Aquitania y la Casa de les Ciencies Humanes de la mesma rexón francesa.

El Seminariu tien como oxetivu estudiar el desarrollu de lliteratures en
llingües que s'atopen nun contestu social desfavorable. Diríxelu'l
profesor Alain Viaut, un estudiosu de la llingua occitana falada nel sur
de Francia, que ye al empar conocedor de la realidá sociollingüística
d'Asturies, comunidá que yá tien visitao delles veces.

Participen tamién nesti Seminariu'l romanista Georg Kremnitz, de la
Universidá de Viena), y otros especialistes d'universidaes d'Austria y
Francia. Al Seminariu participen, pela parte d'Asturies, los profesores
Xulio Viejo Fernández y Ramón d'Andrés (de la Universidá d'Uviéu), y
l'escritor, críticu y editor Antón García, que fadrán esposiciones sobre
estremaos aspectos de la lliteratura y la realidá sociollingüística
d'Asturies. Nun dexará de llamase l'atención sobre la difícil situación
pela que ta travesando la nuestra llingua, agudizada por delles midíes
regresives puestes en marcha poles autoridaes.El vienres, a les 9,15 Xulio Viejo Fernández llerá la ponencia «Antecedentes de la estandarización
literaria del asturiano y reperesentación espacial de la lengua»

a les 9,45 sedrá'l turnu de Ramón de Andrés, collaborador d'Asturies.com con «Le contexte sociolinguistique de la
littérature actuelle en asturien» Antón García, como editor y escritor, rematará la participación asturiana con «Público lector,
difusión y temáticas en la literatura en asturiano hoy».