Llinies d’alta tensión nueves van pasar por dellos conceyos

El BOPA del 22 de marzu saca a información pública la solicitú d’autorización alministrativa y declaración d’impactu ambiental de delles llinies d’alta tensión nueves. Toes xuniríense cola polémica llinia Soto-Penagos.
 
Bloque por Asturies-UNA Compromisu por Siero llanzó esti vienres un comunicáu nel que se muestra contraria a la creación d’esta llinia nueva d’alta tensión que se sumaríase a les munches esistentes nel conceyu y que tamién afeuta a otros conceyos del país. “Paez una burlla que programen otra llinia de 400.000 voltios que diba tarazar con una cicatrizona nueva los nuestros montes y vegues y que diba afectar a la nuestra salú. Tovía tán calientes les reivindicaciones y movilizaciones que provocó’l proyectu Soto–Penagos; tovía tamos asumiendo les consecuencies graves pa la salú que va tener esta llinia y yá pretenden mangamos otra”, señalen dende la formación, que considera que “paez qu’hubiere un plan pa volver Siero un escampáu”. Por ello, reclama al Conceyu que “s’informe y muestre la so oposición a esta llinia que nun va trayer más que perxuicios pal vecindariu”. Esta llinia nueva d’alta tensión saldría de Xixón en direición a Nava pa xunise con Soto-Penagos, que pronto va entrar en funcionamientu, tres pasar por Siero y Sariegu. Amás, el BOPA del 22 de marzu tamién recueye la solicitú d’una llinia d’alta tensión que xuniría Carreño con Xixón, y otra que pasaría por Samartín del Rei Aurelio, Llaviana y Bimenes hasta llegar a Nava. Toes col oxetivu d’enganchar con Soto-Penagos. Mentes, en Xixón tamién ta proyeutada una subestación eléctrica de 400 quilovatios.
 
La formación nacionalista, qu’ apuesta “por un modelu enerxéticu distintu, basáu na producción distribuyida, con xeneración a pequeña escala cercana a los puntos de consumu y con una participación decisiva de les enerxíes renovables”, alerta de que dalgunes de les consecuencies d’una llinia d’estes característiques son un impactu paisaxísticu tremendu; un impactu na salú, con posibilidá de rexistrar un aumentu de leucemies y cáncanos; un runfar permanente; un aumentu de les posibilidaes de quemes; y un aumentu de la contaminación lletromagnética y de la ozonización. Por ello, llamenta la política enerxética del PSOE y el PP basaes “nun modelu que mos convierte nuna comunidá de monocultivu, que defende intereses privaos y que beneficia a la productividá d’otres comunidaes, mientres equí sufrimos los perxuicios y malapenes xeneramos emplegu”.