Llibros n'asturianu pa Reis

Novedaes editoriales de recién n'asturianu y clásicos de la lliteratura infantil igüen un catálogu de más de 150 títulos ente los que los Reis Magos tienen pa escoyer el so regalu n'asturianu pa la reciella na fiesta de mañana.

Una de les novedaes pa los neños más pequeños dala Publicaciones Ámbitu, que presenta Animalinos , un llibru-trebeyu n'asturianu y empobináu pa neños d'ente cero y cuatro años. Fechu en cartón duro plastificáu con dibuxos d'Enrique Carballeira, el llibru tien el sofitu pedagóxicu de Lourdes Álvarez y Sabel Tuñón. Xunta esta obra, tamién hai pa los más neños bien de vocabularios y llibros ilustraos con pallabreros, ente los que rescampla "El mio primer vocabulariu n'asturianu" de l'Academia de la Llingua, del qu'existe una versión tamién en gallego-asturianu entitulada "El meu primeiro vocabulario na fala". Trabe, pela so parte, tien la obra "les mil primeres pallabres n'Asturianu" de l'autora Heather Amery y qu'amiesta'l vocabulariu enxertu na obra tamién n'inglés y castellanu.

Esti añu presentárese tamién la colección "Llingua de Trasgu" dientro de la editorial "asturtoons". Editada a tou color y con un diseñu mui curiáu pa que les llectures-yos llamen l'atención a los neños, la colección tien de mano trés títulos que s'entitulen respectivamente "Los viaxes de Kiki" obra d'Ana Belén Iglesias na que s'espeyen les aventures d'un mur; "¡Menudu elementu!" de Miguel Rojo Martínez, que cunta la historia d'un dinosauriu n'Asturies de la dómina del xurásicu, y "Ana de los animales" l'aventura d'una neña que se comunica colos animales y que sufre les envidies d'un magu malváu, obra del mesmu Quique Carballeira. Nesti terrén de la narrativa existen bien de títulos empobinaos pa toles edaes, rescamplando ente les novedaes d'esti añu "El mundu de Toya" editáu por VTP editorial na coleición "La Pita Pinta" . El llibru ta ilustráu, por María Amor, y cunta la hestoria de Toya, que va tener un hermanu pequeñu.

Nel terrén de los clásicos, la editorial Trabe tien tamién dellos títulos tornaos al asturianu del autor francés Charles Perrault, mientres que na Colección Escolín de l'Academia de la Llingua hai dende la versión n'asturianu del "Adiós Cordera" de Clarín a la obra traducida al asturianu más vendida de tolos tiempos, "El Principín" d'Antoine de Saint-Exupery. Lo que sobra son propuestes.