Llera Ramo va facer un estudiu sociollingüísticu en Xixón

El prestixosu sociólogu asturianu Francisco Llera Ramo, profesor de la universidá del País Vascu y director del Euskobarómetro, tien l'encargu de la Casa de la Llingua del Conceyu de Xixón pa facer un estudiu sociollingüísticu llendáu al ámbetudel conceyu. Anque entovía nun tan pesllaos los plazos nin les característiques específiques del proyectu, la idea básica ye la de treslladar, a una escala y necesidaes concretes, el métodu qu'emplegare Llera Ramo pa facer les dos Encuestes Sociollingüístiques d'Asturies. L'estudiu resultante d'ello tendría una aplicación inmediata en cuantes que sedría una plantiya sobre la qu'axustar les prioridaes na política normalizadora del conceyu más importante d'Asturies, un llabor que-y toca desarrollar a María Xosé Rodríguez al frente de la Casa de la Llingua, órganu que depende de la Conceyalía de Cultura de Xixón.

Esti ye ún de los proyectos más interesantes nos que ta trabayando l'organismu normalizador de Xixón, que tamién tien pendiente la celebración d'unes xornaes sobre normalización llingüística a facer nel mes de payares, ello xunta la edición d'una axenda escolar pa escolinos d'asturianu en Bachiller y ESO. D'otra manera, la Casa de la Llingua ta trabayando na xera normalizadora con dos importantes preseos. D'una parte, la responsable del serviciu yá cursó, con fecha del 24 de xunetu, la solicitú de realización del Espediente de Toponimia del Conceyu a la Xunta de Toponimia del Principáu. D'otra parte, yá ta redactáu l'esperáu documentu d'ordenances d'usu del asturianu en conceyu, que ta presentándose agora a los distintos grupos con representación na casa conceyu con vistes a la so futura aprebación.