Llera Ramo presenta l'estudiu sociollingüísticu de Xixón

El sociólogu asturianu de la Universidá del País Vascu Francisco Llera Ramo presenta güei en Centru municipal d'El Llano de Xixón a les 7:30 de la tarde la primera encuesta sociollingüística sobre l'usu del asturianu na ciudá. El trabayu, fechu por encargu de la Oficina Municipal de la Llingua, va presentalu'l sociólogu acompañáu de la conceyala d'Educación Carmen Rúa y la presidenta de l'Academia de la Llingua Asturiana Ana Cano. Ello va ser nel marcu del Foru de Cultura Asturiana del centru municipal d'El Llano.

El mesmu Francisco Llera Ramo yá diere un avance del estudiu, qu'agora preséntase enteru y editáu en forma de llibru por Editora del Norte n'avientu del 2004. Yá daquella Llera Ramo esplicare que los datos del estudiu sociollingüísticu concretu pa Xixón nun se separtaben demasiao de los que diere la encuesta xeneral d'Asturies fecha pol mesmu equipu del Euskobarómetro que fexo tamién la de Xixón, anque evidentemente, había delles particularidaes propies d'un conceyu que, amás de ser el más grande d'Asturies por población, presentaba tamién una estructura demográfica más complicada, amestando xente de toles procedencies. 600 encuestes son la base d'esti estudiu.