Llera Ramo emponderó la vitalidá de la llingua asturiana en Xixón

El sociólogu responsable del I Estudiu Sociollingüísticu de Xixón sorrayó les especificidaes de les actitúes y comportamientos pa cola llingua nel casu xixonés na primera encuesta sociollingüística que se fai específica pa un conceyu.

El responsable del estudiu sorrayó na presentación del mesmu que se fexo ayeri en Xixón énte un numberosu públicu los aspectos más importantes y les diferencies que se presenten ente facer un estudiu xeneral pa toa Asturies y l'específicu pa ún conceyu. Ente elles, el sociólogu sorrayó la vitalidá del asturianu nun conceyu que ye'l que más población tien de toa Asturies y tamién ún de los qu'amiesten inmigrantes de más procedencies, siendo de fuera de Xixón la metada de la población. Nesti sentíu, Ramo definió Xixón como un "crisol demográficu" con bien d'aportes de conceyos rurales y de les cuenques mineres que, al llegar a la villa de Xovellanos, caltienen sorprendentemente bien l'emplegu del asturianu, guañando una "koiné" o llingua común na que la normalización "faenla los mesmos ciudadanos". Llera Ramo tamién apuntó na parte positiva los bonos datos sobre actitú pa col asturianu por parte de los inmigrantes de fuera d'Asturies. Pa ser a caltener esta llingua común que se fala sobremanera en grupos d'edá medios y avanzaos, Llera Ramo fexo un llamáu a que se faiga un esfuerzu especial na alfabetización n'asturianu d'adultos.

Tocántenes a otra especificidá que suponen los sos estudios, Francisco Llera reflexonó na presentación sobre'l fechu de qu'Asturies sía la única comunidá autónoma na que se fixeron tantos informes sociollingüísticos previos al reconocimientu de la oficialidá de la so llingua. Llera Ramo llamentó qu'exista tanta información y sigan ensin dase pasos al frente pa ser consecuente colo que manden estudios como esti.

L'equipu redactor del estudiu adelantó tamién que se trabaya agora nuna segunda fase de la encuesta que va analizar la percepción del asturianu n'entidaes sociales y polítiques del conceyu, pa lo que lleven faciéndose sesiones y meses de trabayu con representantes del movimientu de vecinos, culturales, comerciantes y deportivos a lo llargo de los últimos meses. Les conclusiones d'esta parte del estudiu van dase a conocer pa febreru.