L.lena sigue rotulando n'asturianu los sos llugares

El Conceyu de L.lena dio anuncia esti fin de selmana de que tien previsto colocar a lo llargo d'esti mes y del mes de xineru los carteles d'una nueva fase, la cuarta yá, de la campaña de recuperación de la toponimia local.

Estos indicadores , que se van colocar nes carreteres que dependen del Conceyu, formen parte d'un programa del Serviciu de Normalización Llingüística de L.lena pa dotar al conceyu d'una señalización basada nos nomes tradicionales que yá s'oficializaron pol Conseyu de Gobiernu del Principáu d'Asturies en xunetu del 2005.

Segúun s'anunció, nesta fase van colocase un total de 13 carteles nes parroquies y llugares de Congostinas, Sorribas, Otero, Mamorana, Muñón Cimiru, La Maramuniz, El Trechuru, Brañal.lamosa, El Quempu, El Brañil.lín, La Muela, La Ilesia y un cartel señalizando'l desvíu pa Ronzón y la Ilesia de Castiel.lo.

Según s'informó, el coste d'estos carteles y la so instalación ascienden a 1.500 euros, subvencionaos pola Conseyería de Cultura al través de la convocatoria de subvenciones destinaes a Corporaciones Locales pa la normalización social de la llingua asturiana.

La primer fase d'esta campaña de rotulación fízose a últimos del 2004, entamando naquel momentu pelos núcleos que nun teníen indicadores. La intención de la Corporación Local ye la de seguir rotulando les carreteres de L.lena , anque de momentu solo se pue actuar nes carreteres de titularidá del Conceyu. Dende la Oficina de Política Llingüistica de L.lena tan faciéndose trámites col fin de que se concedan los permisos pa cambiar les señales de la carretera N-630 y les de competencia del Principáu pero, según s'esplica "hasta agora la respuesta foi negativa aludiendo a la non titularidá de les mesmes por parte del Conceyu".