Ḷḷena promociona la boḷḷa o pegarata tradicional nes panaderíes del conceyu

Esti bollu rellenu ye’l regalu que se recibe de los padrinos el Domingu de Pascua

El Conciyu Ḷḷena repartió a establecimientos de panaderíes y confiteríes la campaña "La Boḷḷa" la mañana del vienres . La iniciativa del Serviciu de Normalización Llingüística busca “apoyar a esti sector ofreciendo materiales que puedan regalar a la clientela”. La promoción fáise con unes tarxetes qu'espliquen la tradición de la boḷḷa, buḷḷu o pegarata, que tamién s'apoya con carteles y difusión en redes sociales.

La campaña usa la variante llingüística del conceyu y l'oxetivu ye reforzar costumes qu'en munchos casos van camudando por otres nueves. Dende’l Serviciu de Normalización creen que “ye bon momentu pa compartir en familia estes tradiciones y tresmitiles a les xeneraciones más nueves”. David Suárez, conceyal de Política Ḷḷingüística afonda en que "la campaña fainos alcordar de momentos familiares y d'una tradición que tenemos de tresmitir y conservar. Tamién ye un apoyu al pequeñu comerciu, dándo-yos materiales pa fortalecer la relación cola clientela".

La boḷḷa ye’l regalu que madrines y padrinos entreguen a los sos afiaos el Domingu de Pascua, qu’esti añu 2022 cae’l 17 d’abril. Sicasí, l’anterior selmana celébrase’l Domingu de Ramos, cuando los afiaos entreguen la palma, y munchos aprovechen pa dar la pegarata por adelantao. Los ingredientes que puen rellenar esti bollu amasáu de farina blanco o d’escanda son chorizu, tocín o panceta. Anque lo más llamativo son los güevos crudos y con cáscara que se ponen sobre la boḷḷa pa que cuezan con ella na forna.