Lleida una tésis doctoral n’asturianu

El Departamentu de Filoloxía Española de la Universidá d'Uviéu, na Facultá de Filoloxía, acoyó la llectura'l pasáu vienres, 16 de payares de la tesis doctoral La fala de Trubia: estudiu sincrónicu y diacrónicu, onomástica y aspectos sociollingüísticos. Redactada y defendida en llingua asturiana, la tesis presentábala Pablo Suárez García, Inxenieru Superior de Telecomunicación y Llicenciáu en Ciencies Matemátiques y, dende'l vienres, Doctor en Filoloxía, llogrando con ella la calificación de "Sobresaliente cum laude" por unanimidá del Tribunal.

Trabayador del Departamentu de Matemática Aplicada a les Tecnoloxíes de la Información de la Escuela Técnica Superior d'Inxenieros de Telecomunicación de la Universidá Politécnica de Madrid, y na empresa "Daedalus" d'Inxeniería Llingüística, Pablo Suárez, que pon clas de Llingua Asturiana nel "Centru Asturianu de Madrid" y na "Casa de Lleón".

La tesis, codirixida pola Dra. Ana Mª Cano González, caderalga de Filoloxía Románica de la Universidá d'Uviéu y pol Dr. Xosé Lluis García Arias, profesor titular de Llingua Española na mesma Universidá, ye una obra descriptiva de la fala de Trubia, incluyenso les parroquies de Trubia, Udrión y Pintoria, na faza más occidental del conceyu d'Uviéu, dende los puntos de vista sincrónicu y diacrónicu. Partiendo de la metodoloxía propia del estructuralismu llingüísticu, faise un estudiu sincrónicu completu de la fala trubieca que se completa con un estudiu diacrónicu d'esta mesma fala, l'estudiu onomásticu de la fastera oxetu d'estudiu, cola compilación y estudiu etimolóxicu de la toponimia y antroponimia trubieques y col estudiu de dellos comportamientos y creencies arraigaos na población con rellación a la so llingua.

Nel xuráu que la premió tuvieron los profesores José Ramón Fernández González, Miguel Ramos Corrada, Mª Jesús López Bobo, Beatrice Schmidt (Universidá de Basilea-Suiza) y Mercedes Brea, (Universidá de Santiago de Compostela).

La Universidá d'Uviéu protagonizó un conflictu bien conocíu col historiador Faustino Zapico, al que nun permitió presentar n'asturianu la so tesis doctoral.

La tésis de Pablo Suárez yá taba presentada con anterioridá al casu del historiador de Mieres y amás pertenez a una facultá onde yá hai otros antecedentes de tesis presentaes n'asturianu.