Llega'l Napster de pagu

El serviciu de descarga d'archivos más usáu na historia de la rede anuncia que vuelve pa últimos del mes de marzu. Napster, que tenía primero de que lu pesllaren los tribunales, 60 millones d'usuarios nel mundu entero, va ser agora un serviciu de pagu. El preciu exactu nun se sabe, pero sí avisen de que van pone-yos un tope mensual de descargues a los veceros. De momentu conviden a face-y una visita al nuevu Napster.

La noticia coincide col avisu d'otra compañía, Audio Galaxy, ún de los servicios d'intercambiu d'archivos que s'espardieron más de la que peslló'l Napster. Audio Galaxy esplicó que tuvieron que retirar la versión más nueva del so programa porque dalgún programador consiguió infesta-yoslu col peligrosu virus Nimda.Nun acaba equí l'actualidá sobre virus, porque estos díes ta espardiéndose per ende el falsu virus "Sulfnbk.exe". Ello ye que se recibe un mensaxe nel que nos avisen de qu'hai que borrar esi archivu del discu duru porque ye peligrosísimu y que tenemos que unviar la información a toles direcciones de corréu que conozamos p'avisar. "Sulfnbk.exe" nun ye nengún peligru, y la estratexa del falsu virus consiste en que a base de reenviar mensaxes llega'l momentu en que puen estragase los servidores.

Contador Estadistiques