Llega la Nueche d’Ánimes: el pasu de la lluz a la escuridá

|
Llega la Nueche d’Ánimes: el pasu de la lluz a la escuridá

Esti martes ye la Nueche d’Ánimes, una xornada mui presente na nuesa tradición anque anguaño contaminada pola so versión estauxunidense: Halloween. Pa esta fecha hai previstes delles actividaes alredor d’esta folixa de raigón celta.

El Samhain o Nueche d’Ánimes, como se conoz n’Asturies, ye l’añu nuevu celta; el pasu del branu al iviernu, cuando la escuridá gana a la lluz. Poro trátase d’una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos.

Son munchos los rituales que se fain esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, más populares anguaño pola televisión y el cine, que se solíen colocar nos cruces de camín nel pasáu. ¿Cómo lo celebres tu? Nesti reportaxe de ‘A la Gueta los Suaños’ pues garrar delles idees.

Otra manera, n’Asturies.com proponémoste delles actividaes pa estos díes:

  • Dende’l día 21 el xixonés Xardín Botánicu Atlánticu vien entamando per sestu añu consecutivu delles actividaes baxo’l nome de ‘Calabaces y Calaveres’, iniciativa con un ésitu grande de públicu, como amuesa que s’escosaren les entraes pal amagüestu pa la Nueche d’Ánimes, nel qu’actúa Salón Tombé. Sí ye posible acudir a la representación d’un versión llibre de la escena ‘No es verdad...’ de ‘Don Juan Tenorio’, a les 17.30 y 21 hores de güei, o a los ‘Cuentos de difuntos’ de mañana (de 12 a 14 hores, 4 pases; y de 16.30 a 18 hores, 3 pases). Tamién se pue visitar la esposición de calabaces del Botánicu.
  • Tamién en Xixón, onde les piscines d’El Llano, l’Asociación Sociocultural La Serena celebra Samhain. La folixa va principiar a les 16 hores con pintacares y dellos talleres, pa siguir con actividaes pa neños y mayores que va finar a medianueche con una ‘queimada terrorífica’ y verbena. A les 20.30 hores, Alberto Álvarez Peña va poner la charra ‘La Nueche d’Ánimes’.
  • Mieres vien apostando dende va un tiempu pola celebración de Samhaín, con actividaes dende’l xueves pasáu. Esta tarde tán previstos dos talleres pa neños y neñes, de cocina saludable na seronda y de creación de pantasmes y arañes con magre poliméricu. De nueche, de 21 a 22 hores y de medianueche hasta les 2, va haber baille n’El Requexu.
  • Llaviana y El Robléu tamién ponen en marcha actividaes por Samhaín o Nueche d’Ánimes.
Contador Estadistiques