Llega a les carteleres la película que rodaron los hermanos Ulloa en Xixón

Dos pelicules españoles rescamplen nes estrenes de la cartelera
d'esta selmana, una d'elles rodada en parte en Xixón. Y ye que les cais
de la villa xixonesa ambienten dello de la película de los hermanos
David y Tristán Ulloa, entitulada "Pudor", que quier ser una
mirada a la intimidá, a los deseos, obsesiones, secretos y mieos
inconfesables. Esi pudor lleva a la incomunicación y a la soledá.
Un home que va morrer, una muyer que recibe anónimos eróticos, un
home mayor a quien l'amor da-y una última oportunidá, una
adolescente qu'intenta superar les duldes de la pubertá y un neñu
que ve pantasmes son los personaxes d'esta historia protagonizada por Nancho
Novo y Elvira Mínguez.

Per otru llau una coproducción hispano-lusa-británica col nome
de "El corazón de la
tierra" llega a les pantalles del nuesu país pa narranos la
historia de les lluches obreres nes mines andaluces de Riotinto. Ambientada en
1888, cuenta la historia de la esplotación sufrida polos mineros por
parte de los patronos de les compañíes mineres. Al llugar llega
un forasteru qu'organiza una huelga de los obreros siendo reprimida duramente
poles autoridaes, que provoquen una matanza. Años depués, dos
muyeres interpretaes por Catalina Sandino Moreno y Sienna Guillory, que
vivieron de neñes aquella matanza, recuperarán les demandes y
l'espiritu d'eses protestes. Mas estrenes pa esta selmana na nuesa
cartelera.